Pas dënimit nga Gjykata, Fadil Nura e liron Haxhi Bejtën nga pozita e drejtorit të prokurimit

Kryetari i Komunës së Skenderajt, Fadil Nura, e ka liruar nga detyra e drejtorit të Prokurimit, Haxhi Bejtën, pasi ndaj tij ekziston një vendim dënues nga shkalla e parë e gjykatës.

Haxhi Bejta është shpallur fajtor nga Gjykata Themelore në Prishtinë në grup me ish-kryetarin e Leposaviqit dhe 12 të akuzuar të tjerë për keqpërdorim të detyrës zyrtare. Kjo akuzë i rendohet për periudhën 2015 – 2017 gjatë kohës sa ishte drejtor i Prokurimit në Komunën e Leposaviqit.

Bejta ka një përvojë të gjatë brenda Komunës së Skenderajt si shërbyes civil, kryesisht në pozitën e shefit të Prokurimit. Në prag të pensionimit të tij, Komuna e Skenderajt formoi një Drejtori të Prokurimit duke e emëruar atë udhëheqës të saj.

Saktësisht, më 05.10.2024, Bejta është bërë Drejtor i Prokurimit – si i emëruar politik.

Më 03.03.2025, kryetari Nura e liroi nga detyra pas tre muajve që Gjykata Themelore në Prishtinë kishte vërtetuar dënimin me burgim prej 2 vite e 6 muaj. Lirimi i tij nga kjo pozitë u konfirmua për KALLXO.com nga Komuna e Skenderajt.

Si pasardhës i Haxhi Bejtës është emëruar Habib Asllani në pozitën e Drejtorit të Prokurimit.

Asllani ka përvojë në Korporatën Energjetike të Kosovës si zyrtar i lartë i Prokurimit. Këtë pozitë, sipas regjistrit të Agjencisë për Parandalimin e Korrupsionit, e ka mbajtur nga 03.04.2017.

Për çka akuzohet Haxhi Bejta?

Më 05.12.2024, Gjykata e Prishtinës e ka shpallur fajtor ish-kryetarin e Leposaviqit Dragan Jabllanoviq duke e dënuar me 3 vite burgim për veprën penale të “Keqpëdorimit të pozitës dhe autoritetit zyrtar”. Fajtorë janë gjetur edhe 13 të akuzuarit e tjerë, përkatësisht: Haxhi Bejta, Aleksandar Ackoviq, Xhemajl Ferizi, Haki Haxhiu, Mehdi Haxhiu, Aleksandar Kostiq, Çedomir Timotijeviq, Mensur Rama, Mirosllav Ivanoviq, Bojan Banoviq, Nijazi Musliu, Ivan Kadiq dhe Boban Millovanoviq.

Sipas aktgjykimit të shpallur, Haxhi Bejta, Aleksandar Ackoviq, Aleksandar Kostiq, Çedomir Timotijeviq, Bojan Banoviq, Mirosllav Ivanoviq, janë gjetur fajtor se në bashkëkryerje dhe vazhdimësi kanë kryer veprën penale: “Keqpërdorim i pozitës apo autoritetit zyrtar”.

Haxhi Bejta është dënuar me burgim prej 2 vjet e 6 muaj.

Prokuroria Speciale akuzon Dragan Jabllanoviqin, Haxhi Bejtën, Aleksandar Açkoviqin, Xhemajl Ferizin, Haki Haxhiun, Mehdi Haxhiun, Aleksandar Kostiqin, Çedomir Timotijeviqin, Mensur Ramajn, Mirosllav Ivanoviqin, Bojan Banoviqin, Nijazi Musliun, Ivan Kadiqin dhe Boban Millovanoviqin se gjatë periudhës kohore 2015-2017 aktivisht kanë marrë pjesë në veprimtari kriminale.

Sipas aktakuzës, Dragan Jabllanoviqin akuzohet se në mënyrë të kundërligjshme ka emëruar të akuzuarin Haxhi Bejta si drejtor të Prokurimit në Komunën e Leposaviqit, kurse të akuzuarve të tjerë i njëjti u ka caktuar detyra të ndryshme në prokurim për tenderë me vlerë disa milionë euro.

Bejta akuzohet se me qëllim që t’i eliminojë operatorët tjerë ekonomikë në kontratën: “Furnizimi me material ndërtimor dhe ndërtimi i shtëpive dhe objekteve tjera ndërtimore të nevojshme në Komunën e Leposaviqit”, me vlerë të parashikuar prej 2 milionë e 400 mijë euro, e ka ndryshuar dosjen e tenderit.

Me këtë, sipas Prokurorisë, ia ka mundësuar operatorit ekonomik – konzorciumit “Projektuesi” SHPK & NP “Bislimi” SHPK, me drejtorin, kushëririn e tij- të pandehurin Xhemajl Ferizi, të fitojë tenderin dhe më 30.07.2015, ta nënshkruajë këtë kontratë, për periudhën kohore prej 30.07.2015 deri 30.07.2018.

Në seancën e mbajtur më 02.12.2024, Haxhi Bejta në fjalën përfundimtare tha se nuk ka lidhje me akuzën që i ngarkohet. I njëjti tha se ka punuar sipas Ligjit të prokurimit dhe ligjit të Kosovës.

Tutje, Haxhi Bejta tha së është i pafajshëm dhe kërkoi nga Gjykata që ta lirojë nga akuza.

‘Përplasja’ e Sami Lushtaku dhe Fadil Nurës me Bekim Jasharin për Haxhi Bejtën

Më 02.01.2022, KALLXO.com kishte publikuar hulumtimin i cili tregonte detajisht ‘lëmshin’ që ishte krijuar pasi Bekim Jashari, ish- kryetar i Skenderajt, e kishte dërguar Haxhi Bejtën në komision disiplinor dhe ia kishte ndryshuar pozitën brenda komunës si shërbyes civil. Këto vendime të Jasharit nuk i kishin pëlqyer Sami Lushtakut, si njeri i afërt me Bejtën.

Ish-kryetari Bekim Jashari në emisionin “Kallxo Përnime” në muajin nëntor 2021 rrëfeu se si tash, nënkryetari i Komunës, Sami Lushtaku e kishte lutur që “mos t’ia nguc njerëzit e tij“, e në këtë mes hyn edhe Haxhi Bejta.

Madje sipas Jasharit, Lushtaku ishte lënduar goxha shumë nga ky vendim.

“Është lëndu goxha shumë pse unë e kam largu, apo në fakt e ka largu ai vetëveten, ish-shefin e Prokurimit. Ka shku në komision disiplinor, komisioni e ka largu. U mundu me bë ankesë në gjykatë, por i ka humb. Ai nuk e ka respektu orarin, nuk u ardhë në punë. Unë pastaj ia kam ndërru vendin e punës, sepse ma lejon ligji, por ai s’ka dashtë me ardhë më në punë”- kishte deklaruar Jashari duke aluduar në Haxhi Bejtën.

Për këtë çështje, kryetari Fadil Nura pasi mori drejtimin e Komunës së Skenderajt, ishte pyetur edhe në intervistën në KALLXOPërnime në muajin nëntor 2021.

“E ka fitu rastin në Këshill të Pavarur, janë vendimet, nuk i kanë zbatu”- kishte thënë Nura teksa po përmendte disa vendime të Bekim Jasharit që i konsideronte të jashtëligjshme.

Në shkurt të vitit 2018, Komuna e Skenderajt në krye me Bekim Jasharin kishte vendosur që ta dërgojë Haxhi Bejtën, në komision disiplinor nën arsyetimin se i njëjti nuk po lajmërohej në punë, pasi ia kishin ndryshuar pozitën brenda Komunës.

Paraprakisht, Jashari e kishte zhvendosur Haxhi Bejtën nga shef i Zyrës së Prokurimit në zyrtar për trashëgimi në Drejtorinë e Kulturës, Rinisë dhe Sportit. Por, për shkak të mungesave në punë në pozitën e re, Haxhi Bejta u dërgua në komision disiplinor. Ndaj tij ky komision shqiptoi vërejte me shkrim.

Gjithashtu, pas vendimit të komisionit disiplinor, Jashari kishte nxjerrë vendimin me të cilin ka bërë pezullimin parandalues me pagesë 50% deri në 3 muaj në pagë.

Kundër vendimit të komisionit disiplinor dhe kundër vendimit të Bekim Jasharit, në mars të vitit 2018, Haxhi Bejta ka parashtruar ankesë në Komisionin për Zgjidhjen e Kontesteve dhe Ankesave të Komunës së Skenderajt.

Ky Komision kishte aprovuar ankesën dhe anuluar vendimet paraprake dhe e ka kthyer rastin e Haxhi Bejtës në rishqyrtim te komisioni disiplinor.

Por i pakënaqur nga moszbatimi i vendimit të Komisionit të Ankesave, Bejta iu drejtua Këshillit të Pavarur Mbikëqyrës të Shërbimin Civil (KPMSHC). Edhe ky Këshill vendosi në favor të tij duke e obliguar Komunën që t’i kthejë mbrapsht vendimet që mori kundër Bejtës.

“Obligohet kryetari Bekim Jashari që të bëjë zbatimin e këtij vendim brenda afatit 15 ditësh që nga dita e pranimit të këtij vendimi, duke e kthyer Haxhi Bejtën në vendin e tij të punës sipas aktemërimit të datës 27.04.2012 me të gjitha të drejtat dhe detyrimet që lidhen nga marrëdhënia e punës dhe duke bërë kompensimin e pagës nga dita e ndërprerjes së marrëdhënies së punës deri në zbatimin e këtij vendimi”, thuhet në këtë vendim.

Bekim Jashari nuk e përfilli këtë vendim, por pasi Haxhi Bejta po vazhdonte duke mos u paraqitur në punë, e dërgoi sërish në komision disiplinor në vitin 2019.

Komisioni disiplinor vendosi edhe një herë kundër tij duke ia humbur plotësisht statutin e shërbyesit civil. Kjo duke u bazuar në Ligjin për shërbyesit civilë, neni 66 pika 4.3, që thotë se komisioni disiplinor pas vendimit për shkelje të rëndë ka të drejtë që të shqiptojë masë disiplinore – ndërprerje të marrëdhënies së punës në Shërbimin Civil.

Arsyetimi i tyre ishte se nga data 15 shkurt 2019 deri më 16 prill 2019, Haxhi Bejta nuk kishte dalë në punë. Ndërkaq, sipas Ligjit për zyrtarët publikë, shkelje e rëndë konsiderohet “braktisja e punës ose mungesa e paarsyeshme dhe e vijueshme për 5 ditë pune apo më shumë”.

“Pas shqyrtimit të lëndës, Komisioni në fjalë sipas provave të raporteve të hyrje-daljeve nga Zyra e Personelit z.Haxhi Bejta nuk është lajmëruar në punë prej datës 15.02.2019 gjerë më sot. Andaj në bazë të rregullores për procedura disiplinore, mosinformim dhe mungesa e paarsyeshme për dy ditë punë të njëpasnjëshme cilësohet Shkelje e Rëndë – serioze të Kodit të Mirësjelljes për nëpunësin Haxhi Bejta – zyrtar për trashëgimi në drejtorinë për Kulturë, Rini dhe Sport”, thuhet në vendimin që KALLXO.com ka siguruar.

Por qeverisja e re që erdhi pas zgjedhjeve lokale të 2021-ës, e rikthyen Haxhi Bejtën në shef të tenderëve të Komunës së Skenderajt. Kjo është konfirmuar edhe nga Zyra për Informim e Komunës së Skenderajt.

Sipas tyre, vendimi i transferit të Haxhi Bejtës në zyrtar për trashëgimi përbën shkelje të Ligjit për shërbyesit civilë.

“Me këtë veprim është shkelur neni 28 paragrafi 3, nënparagrafi 3.4 i ligjit për Shërbimin Civil të Republikës së Kosovës dhe rregullorës nr. 06/2010 për transferimin e nënpunësve civil, pasi sipas atij vendimi z. Bejta është degraduar nga kategoria funksionale udhëheqës në kategorinë funksionale profesionale, gjë e cila përbën shkelje të nenit 28 të ligjit për shërbyesit civil”- kishte thënë Komuna e Skenderajt në fund të vitit 2021.

Në anën tjetër, më 29.12.2021, Lista e Pavarur  e Bekim Jasharit, përmes asamblistëve të saj, ka ushtruar kallëzim penal kundër kryetarit të Komunës së Skenderajt, Fadil Nura, për keqpërdorim të detyrës zyrtare “duke emëruar në kundërshtim me ligjin” Haxhi Bejtën shef të Zyrës së Prokurimit.