Në Obranqë të Podujevës gjenden eshtra që dyshohet të jenë nga lista e personave të zhdukur gjatë luftës

Gjatë gërmimeve në fshatin Obranqë të Podujevës, Komisioni Qeveritar për Persona të Zhdukur, në bashkëpunim me Institutin e Mjekësisë Ligjore (IML) dhe Policinë e Kosovës, kanë hasur në eshtra që dyshohet se mund të jenë të personave nga lista e personave të zhdukur me dhunë, gjatë luftës në Kosovë.

Përmes një njoftimi, Komisioni bën të ditur se eshtrat e gjetura janë duke u ekzaminuar nga ekspertët e IML-së, me qëllim të identifikimit të saktë.

“Këto gërmime u realizuan në bazë të informacionit që qytetarët kishin ndarë në fund të muajit janar, për çka ju jemi mirënjohës.” – thuhet nga Komisioni për Persona të Zhdukur.

Tutje, Komisioni Qeveritar për Persona të Zhdukur thekson se “shprehin përkushtimin e vazhdueshëm në zbardhjen e fatit të çdo personi të zhdukur dhe inkurajon qytetarët të vazhdojnë të ofrojnë informacione të vlefshme”.