NATO: ‘Air Defender 23’ do të jetë stërvitja më e madhe ndonjëherë

Forcat Ajrore Gjermane po përballen me sfidën e saj më të madhe në dekada: Pas katër viteve përgatitje, stërvitja ushtarake e NATO-s Air Defender 23 do të fillojë të hënën, më 12 qershor.

Është stërvitja më e madhe e këtij lloji që nga krijimi i aleancës ushtarake në vitin 1949 dhe Gjermania do të shërbejë si nikoqir dhe qendër logjistike.

Nga data 12 deri më 23 qershor, deri në 250 avionë do të vendosen në gjashtë baza ushtarake, ku do të marrin pjesë 25 shtete. Vetëm SHBA po dërgon 100 avionë përtej Atlantikut. Në ajër, pjesëmarrësit do të stërviten në situata krize në tri zona fluturimi: mbi Gjermaninë veriore në Detin e Veriut, në lindje dhe në një brez të vogël të Gjermanisë jugore. Këto zona do të mbyllen në mënyrë alternative për avionët civilë çdo ditë për disa orë.

Priten vonesa në trafikun ajror civil

Trafiku i rregullt ajror është pjesë e sfidës, pasi qiejt mbi Evropë janë ndër shtigjet më të ngarkuara të fluturimit në botë. Ekspertët e aviacionit po vëzhgojnë për të parë nëse trafiku ajror civil mund të vazhdojë të funksionojë kryesisht i paprekur, paralelisht me stërvitjen Air Defender 23.

Gjatë 10 ditëve të manovrave ushtarake, aeroportet gjermane i kanë zgjatur orët e tyre të funksionimit deri në natë. “Shpresoj që, nëse të gjitha këto masa janë efektive, nuk do të ketë anulime fluturimesh”, thotë Ingo Gerhartz, gjeneral-lejtnant në Forcat Ajrore Gjermane. Megjithatë, ai nuk ka dashur t’i përjashtojë mundë sitë për vonesa në nisje apo mbërritje.

Për 30 vitet e fundit, puna e operatorëve gjermanë të kullave të kontrollit civil dhe ushtarak është integruar, sipas ekspertit gjerman të aviacionit Clemens Bollinger. Ai tha për Dë se kontrollorët e fluturimit janë në komunikim të vazhdueshëm me kolegët e tyre në forcat ajrore.

Kjo është një veçori e veçantë e kontrollit gjerman të trafikut ajror, krahasuar me vendet e tjera në Evropë, dhe u prezantua për shkak se hapësira ajrore gjermane përdoret shumë. Ndërsa forcat ajrore franceze i mbyllin vazhdimisht zona të tëra fluturimi për fluturime të planifikuara edhe gjatë operacioneve normale, fluturimet civile dhe ushtarake në Gjermani koordinohen me njëri-tjetrin çdo ditë.

NATO dërgon një mesazh parandalimi

NATO dëshiron të dërgojë një mesazh politik të parandalimit me stërvitjen e saj Air Defender.

Më shumë se 10,000 ushtarë nga vendet e NATO-s do të marrin pjesë në stërvitje të shumta. Disa prej tyre do të jenë me bazë tokësore, duke përfshirë një “evakuim nga një fushë ajrore”, Kjo stërvitje me sa duket iu shtua orarit pas kaosit në aeroportin e Kabulit në vitin 2021, kur SHBA dhe aleatët e saj përfunduan me nxitim misionin e tyre në Afganistan.

Skenarët e tjerë përfshijnë mbështetjen e trupave tokësore nga ajri, betejat ajrore kundër avionëve të armikut dhe përgjimin e raketave me rreze të mesme veprimi nga bombarduesit luftarakë të NATO-s.

Manovrat e NATO-s gjatë kundërofensive të Ukrainës

Nuk është sekret se kur bëhet fjalë për këtë “armik”, shumë në Evropë mendojnë së pari për Rusinë dhe ofensivën e plotë që ajo ka luftuar kundër Ukrainës që nga 24 shkurti 2022.

Amy Gutmann, ambasadorja e SHBA në Gjermani, ka deklaruar se stërvitjet do të përbëjnë një shfaqje “mbresëlënëse” të forcës ndaj vendeve të tjera në botë.

SHBA dhe aleatët e saj në NATO po luajnë kartën e parandalimit dhe kjo mund të ketë gjithashtu një efekt anësor të dëshirueshëm për ta. Forcat e armatosura ruse do t’i studiojnë gjithashtu këto manovra të NATO-s, ndërsa në Ukrainë, ushtria ukrainase po rrit presionin ndaj sulmuesve rusë, me kundërsulme përgjatë frontit në lindje dhe jug të vendit.

Kujtojmë se tensionet dhe situata në veri të vendit ka bërë Kosova të përjashtohet nga stërvitja “Defender Europe 23”. Ambasadori amerikan në Kosovë, Jeff Hovenier e pati konfirmuar zyrtarisht se Kosova është përjashtuar nga ushtrimi “Defender Europe 23” si masë sanksionuese pas zhvillimeve të fundit në veri të vendit.

Kosova ishte pjesë e “Defender Europe 21” ndërsa planifikohej të ishte pjesë edhe këtë vit./DW

Përgatiti: Nuhi Shala