Moti gjatë javës së ardhshme, me reshje shiu

Reshje të shiut priten gjatë javës së ardhshme në Kosovë dhe kjo pritet të përmirësojë situatën për shkak të mungesës së reshjeve që nga muaji shkurt 2025, thotë Instituti Hidrometeorologjik i Kosovës.

“Reshjet do të jenë të konsiderueshme, kryesisht në formë shiu në viset e ulëta, ndërsa në zonat malore pritet që reshjet të shoqërohen edhe me borë” – thuhet mes tjerash në njoftimin e IHMK-së.

Në zona me infrastrukturë të dobët ka mundësi për vërshime të shpejta për shkak të intensitetit të reshjeve, thekson IHMK-ja.

“Era do të jetë e pranishme nga drejtimi jugperëndimor dhe verilindor, me shpejtësi mesatare dhe, lokalisht, të fortë” – thuhet tutje në njoftim.

Të hënën e 24.03.2025 pritet mot i vranët dhe me intervale me diell. Riga të dobëta shiu mund të sjellin vranësirat. Temperaturat minimale pritet të lëvizin nga 3-6 gradë Celsius kurse maksimalet 16-19.

Mot me diell dhe vranësira të shpërndara pritet të martën. Temperatural minimale pritet të lëvizin nga 4 deri në 7 gradë Celsius kurse maksimale nga 15 në 18.

Dita e mërkurë pritet të jetë me mot të vranët dhe me kushte për riga shiu. Minimalet e temperaturave do të lëvizin nga 4 deri në 7 gradë Celsius kurse maksimale nga 13 në 16.

E enjtja parashikohet me vranësira dhe intervale dielli. Vende-vende priten kushte për shi. Temperaturat pritet të lëvizin nga 3 deri në 6 gradë Celsius ato minimalet kurse nga 9 deri në 13 maksimalet.

Vranësira dhe shi priten të premten. Temperaturat minimale pritet të lëvizin nga 3 deri në 6 gradë Celsius kurse maksimalet mes 7 dhe 11.