Ministri i Drejtësisë kërkon hetimin e hyrjes së vaksinave në veri

Ministri i Drejtësisë, Selim Selimi ka kërkuar që të fillojnë hetimet për hyrjen e vaksinave ilegale kundër COVID-19,  në veri të Kosovës.

Selimi ka shkruar në Facebok, se Republika e Kosovës ka sistemin e prurjes së vaksinave përmes Ministrisë së Shëndetësisë dhe IKShP-së dhe se sipas tij, çdo vaksinë ose medikament që hyn jashtë ketij sistemi mund të jetë ilegal dhe ta cenojë sigurinë kombëtare të Republikës.

“Ne nuk kemi ndarje të privilegjit se kush merr vaksinë më herët apo më vonë. Çdo qytetar i Republikës është i barabartë. Rrugët e kontrabandës duhet të hetohen dhe të mbrohet integriteti territorial”, ka shkruar mes tjerash ministri.

Presidenti i Serbisë, Aleksadar Vuçiq dje deklaroi se në veri të Kosovës ka filluar vaksinimi kundër coronavirusit, me vaksinën e kompanive Pfzer/BioNTech, e cila para disa ditëve ka arritur në Serbi.

Kurse, Qeveria e Kosovës ka bërë të ditur se në bazë të informatave të pranuara nga Dogana dhe Policia Kufitare, nuk ka të dhëna se nga kanë hyrë vaksinat kundër COVID-19, për të cilat është raportuar dje se janë duke i marrë qytetarët në Mitrovicën e Veriut.

Më poshtë e gjeni publikimin e plotë të Selim Selimit në Facebook:

Kallëzim publik për Prokurorinë dhe Policinë

Ftoj Kryeprokurorin e Shtetit dhe U.D. Drejtorin e Policisë së Kosovës që të fillojnë hetimet për hyrjen e vaksinave ilegale në veri. Përtej obligimit tonë që të sigurojmë shëndetin e të gjithë qytetarëve tanë pa dallim etnie, Republika e Kosovës ka sistemin e prurjes së vaksinave përmes Ministrisë së Shëndetësisë dhe IKShP-së. Çdo vaksinë ose medikament që hyn jashtë ketij sistemi mund të jetë ilegal dhe ta cenoj sigurinë kombëtare të Republikës.

Ne nuk kemi ndarje të privilegjit se kush merr vaksinë më herët apo më vonë. Çdo qytetar i Republikës është i barabartë. Rrugët e kontrabandës duhet të hetohen dhe të mbrohet integriteti territorial.

Ky sistem i kamufluar si çështje humanitare jep indikacion se ka rrugë të kontrabandës në veri. Këto rrugë duhet të mbyllen! Çështjet humanitare janë udhërrëfyes yni, por duhet të bëhen rrugëve zyrtare si dy shtete.

Nuk kemi qytetar të kategorisë së parë ose të dytë. Të gjithë jemi kosovarë dhe si të tillë i obligohemi vetëm nje Kushtetute e një ligji.

Kemi sistem unitar të shtetit. Tendencat e Serbisë për ta rrezikuar këtë sistem, qoftë edhe në sistem shëndetesor, përbën cenim të integritetit tonë.