Luis Rubiales jep dorëheqjen si president i futbollit spanjoll

Presidenti i Federatës së Futbollit të Spanjës (RFEF), Luis Rubiales, të dielën dha dorëheqjen nga posti i tij si president i Federatës spanjolle të futbollit pas disa javësh kritikash të ashpra për puthjen e tij të padëshiruar me fituesen e Kupës së Botës për femra, Jennifer Hermoso.

“Sot, njoftova presidentin e përkohshëm në orën 09:30 pasdite, zotin Pedro Rocha, se kam dhënë dorëheqjen si President i RFEF”, ka thënë Rubiales përmes një postimi në plaformën X, e njohur më parë si Twitter.

“E kam bërë të ditur gjithashtu se kam dhënë dorëheqjen nga pozita ime në UEFA, në mënyrë që posti im i zëvendëspresidentit të mund të plotësohet”.

Federata Spanjolle e Futbollit (RFEF) konfirmoi se Rubiales kishte paraqitur dorëheqjen e tij si shef i Federatës Spanjolle të Futbollit, si dhe zëvendëspresident i UEFA-s.

“Federata Mbretërore e Futbollit Spanjoll konfirmon se Luis M. Rubiales Béjar ka paraqitur dorëheqjen e tij sonte”, thuhet në një deklaratë e lëshuar nga RFEF.

“Kjo i është bërë e ditur subjektit federativ përmes një letre drejtuar Pedro Rocha Junco-s. Përveç kësaj, ai dha dorëheqjen edhe nga posti i tij si nënkryetar i UEFA-s”.

Puthja e Rubiales dhënë fitueses së Kupës së Botës për femra, Jennifer Hermoso, pas fitores së ekipit spanjoll në finalen e Kupës së Botës për femra më 20 gusht, puthje kjo për të cilen Hermoso thotë se ishte e padëshiruar për të, shkaktoi reagime në Spanjë dhe në mbarë botën. 46-vjeçari Rubiales më parë kërkoi falje dhe e përshkroi puthjen si “të ndërsjellë” – një pretendim ky të cilin Hermoso e mohoi, duke thënë se nuk pajtohet.

Rubiales u pezullua përkohësisht nga organi qeverisës botëror FIFA për 90 ditë, ndërkohë që po zhvillohet një hetim disiplinor./CNN

Përgatiti: Nuhi Shala