Liberalizimi i tregut të energjisë, Oda Ekonomike i drejtohet Avokatit të Popullit

Oda Ekonomike e Kosovës i është drejtuar institucionit të Avokatit të Popullit, duke i kërkuar që të iniciojë lëndë në Gjykatën Kushtetuese për të pezulluar për një vit vendimin për kalimin e bizneseve në tregun e hapur të energjisë.

OEK i kërkoi Avokatit të Popullit që ta dërgojë këtë lëndë në Kushtetuese, pasi argumentoi se një kalim i tillë në treg të hapur do të ketë ndikim të drejtpërdrejt në koston e prodhimit apo shërbimit. Në kërkesën drejtuar Avokatit të Popullit, OEK renditi arsyet e kërkesës për një pezullim njëvjeçar

“Një rritje e tillë do të ndikonte negativisht në konkurrueshmërinë e bizneseve në tregun e brendshëm dhe atë të jashtëm, duke ulur gjithashtu standardin jetësor të qytetarëve” – thuhet në postimin e Odës më 23.03.2025.

Kjo odë tha se bizneset argumentojnë se dalja nga tregu i rregulluar mund të sjellë rritje të ndjeshme të kostove të energjisë, duke ndikuar drejtpërdrejt në qëndrueshmërinë financiare.

“Shumë kompani nuk janë të përgatitura për këtë kalim dhe kanë nevojë për më shumë kohë për t’u përshtatur me modelin e tregut të lirë”, tha OEK-u, duke shtuar se një kalim i menjëhershëm në një treg të liberalizuar të energjisë do të bënte që bizneset më të vogla të penalizoheshin më shumë, duke “ndikuar negativisht në konkurrencë”.

Kosova është vendi i fundit në rajon që po vendos që bizneset e mesme dhe të mëdha të kalojnë në tregun e lirë të energjisë elektrike.

ZRrE ka marrë vendim që bizneset që kanë më shumë se 50 të punësuar dhe ato që kanë mbi 10 milionë euro qarkullim të kalojnë nga tregu i energjisë me çmime të rregulluara në treguan e lirë. Vendimi pritet të hyjë në fuqi më 01.06.2025.

Gjatë emisionit “KALLXOPërnime” më 14.03.2025, Petrit Pepaj nga Zyra e Rregullatorit të Energjisë (ZRrE) ka thënë se ideja e vendimit është që bizneset të kenë qasje në treg të liberalizuar të tarifave.

“Prej vitit 2017 i kemi diskutuar këto shqetësime. Janë shqetësime të drejta- nuk janë shqetësime që nuk duhet me u marrë parasysh. Konsumatorët edhe në vendet e tjera funksionojnë në treg të liberalizuar, si në Shqipëri, si në Maqedoni [të Veriut]. Nuk përcaktohet çmimi nga autoritetet rregullatore për bizneset” – ka thënë Pepaj.

ZRrE njofton për liberalizim të tregut të energjisë në Kosovë