Kurti: Bisedimet pas certifikimit të rezultateve, pastaj Qeveria e udhëhequr nga LVV dhe unë

Kryeministri i Kosovës, Albin Kurti ka thënë se bisedimet për formimin e Qeverisë do të fillojnë pas certifikimit të rezultateve të Zgjedhjeve të 9 shkurtit 2025.

Ai shprehet i bindur se Qeveria e ardhshme do të udhëhiqet nga ai dhe partia e tij.

“Së pari rezultatet përfundimtare, pastaj certifikimi, pastaj bisedimet, pastaj Qeveria e udhëhequr nga Vetëvendosje dhe unë.” – ka thënë Kurti kur u pyet nga KALLXO.com se cilat janë kushtet për të bërë marrëveshje me partitë e komuniteteve.

Sipas shifrave të KQZ-së, Lëvizja Vetëvendosje (LVV) ka marrë 396,022 vota, apo 42.27%. Partisë që ka qeverisur katër vjet do t’i takojnë 48 ulëse në Kuvend. Kjo do të thotë se do ta ketë të vështirë formimin e Qeverisë pa koalicion.

Pas LVV-së, Partia Demokratike (PDK) është renditur e dyta me 196,353 vota, apo 20.96 %, e cila do t’i ketë 24 mandate. Lidhja Demokratike (LDK) me 171,249 vota, apo 18.28% do t’i ketë 20 deputetë. Kurse, Koalicioni AAK-Nisma ka marrë 66,226 vota, apo 7.07%.

Lista Serbe do t’i ketë 9 ulëse, ndërsa 1 ulëse nga komuniteti serb e ka fituar partia e Nenad Rashiqit. 10 ulëset e tjera janë fituar nga komunitetet e tjera joshumicë, me dy deputetë Kosova Demokratik Partisi dhe me nga një deputet janë partitë: Iniciativa e Re Demokratike e Kosovës, Nova Demokratska Stranka, Socijaldemokratska Unija, Partia Liberale Egjiptiane, Koalicija Vakat, Partia e Ashkalinjve për Integrim, Jedinstvena Goranska Partija dhe Partia Rome e Bashkuar e Kosovës.

Zgjedhjet e vitit 2025 për Kuvend të Kosovës janë të gjashtat me radhë që janë mbajtur që nga shpallja e pavarësisë së Kosovës, më 17.02.2008.

Nënkryetari i Lëvizjes Vetëvendosje, Glauk Konjufca tha se partia e tij synon që ta formojë Qeverinë e re me mbështetjen e partive joserbe.

“Siç e keni parë, Qeveria Kurti 2 u formua në bashkëpunim me minoritetet joserbe. Ky është qëllimi ynë sepse ka pasur ndikim pozitiv në Kosovë, duke parandaluar Listën Serbe, që operon nën ndikimin e Beogradit, që të ketë pushtet vendimtar – siç kishte në Qeveritë paraprake.” – tha Konjufca për institutin dhe median online me seli në Itali, Osservatorio Balcani e Caucaso Transeuropa – transmeton REL.

Kryetari i Kuvendit, Glauk Konjufca tha se ka pak të ngjarë që LVV-ja të bashkëpunojë me partitë që aktualisht janë në opozitë. “Nëse do të jetë e nevojshme ne do të takohemi si udhëheqës dhe të vendosim për hapat e ardhshëm, por sa u përket partive opozitare ato kanë ndërmarrë një qëndrim pengues. Sulmet ndaj LVV-së kanë qenë agresive dhe mendoj se këto Zgjedhje ishin mjaft jofer, me akuza jofer dhe me goditje të ulëta.” – shtoi Konjufca, transmeton Radio Evropa e Lirë.

Subjektet opozitare Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës janë shprehur kundër bashkëpunimit me LVV-në e Kurtit. Por, kreu i Nismës – parti që garoi në koalicion me AAK-në dhe disa parti të tjera – Fatmir Limaj ka deklaruar se nuk ka “vija të kuqe” sa u përket koalicioneve të mundshme: qoftë me LVV-në, qoftë me partitë aktuale në opozitë.

Kryetari i Nismës, Fatmir Limaj, i cili ka lidhur Koalicion parazgjedhor me Ramush Haradinajn, ka deklaruar në emisionin Debat Plus, më 20.02.2025, se është i hapur për koalicione pas Zgjedhjeve.

Limaj tha se për të nuk janë me rëndësi pozicionet, por temat nacionale.

“Kush më fton në tavolinë, unë shkoj, ulna për Kosovën. Pikë. Unë shkoj ulna për tema nacionale. S’janë me rëndësi pozicionet… Çka po të vyen një Qeveri jofunksionale. S’më ke mua në një Qeveri jofunksionale. Kurrë, nuk hyj. Në një Qeveri që është kundër interesave të Kosovës. Nuk futem.” – ka deklaruar Limaj, në DebatPlus.

Sa i përket Koalicionit parazgjedhor, Limaj tha se AAK dhe Nisma janë dy parti politike të ndara.

Ramush Haradinaj i AAK-së kishte deklaruar se do të ndihmojë një Qeveri të opozitës, e assesi koalicion me LVV-në.

“Ne e shohim që në këtë politikë që e kam udhëheq, si ndaj mashtruesit që e udhëheq Kosovën, pra Qeverisë mashtruese, mendoj që është në nderin tim që të ndihmoj një Qeveri të opozitës, e assesi koalicion me VV-në.” – tha Haradinaj, në një Konferencë për media, më 10.02.2025.

Në anën tjetër, një sinjal ndër fjalë e ka dhënë kryetari i PDK-së, Memli Krasniqi pas takimit me Të ngarkuarën me Punë në Ambasadën Amerikane, Anu Prattipati.

“Pavarësisht rrethanave politike, angazhimi ynë për të mirën e qytetarëve dhe forcimin e institucioneve të shtetit mbetet i palëkundur.” – ka shkruar ai, në një postim në Facebook, më 19.02.2025.

PDK, si partia e dytë fituese në këto Zgjedhje, ndonëse fillimisht nuk ka vënë vija të kuqe për koalicion me LVV-në e ka qartësuar pozicionin e saj, më 10.02.2025 – duke i thënë “Jo” një oferte të mundshme nga partia e Kurtit.

Kandidati për Kryeministër i PDK-së, Bedri Hamza tha se nuk do të përfshihen në asnjë koalicion me VV-në.

“Më obligon mua që të sillemi ashtu që ta respektojmë vullnetin e shumicës për ndryshim. Nuk do të përfshihemi në asnjë koalicion me VV-në. Ata duan pushtet absolut.” – tha ai, në një Konferencë për media, më 10.02.2025.

Kandidati për Kryeministër nga LDK-ja, Lumir Abdixhiku kishte deklaruar më 12.02.2025 se mban qëndrimet që i ka pasur edhe para Zgjedhjeve.

“Do t’i respektojë këto preferenca, sepse nuk di ndryshe! Qëndrimet e mia e të LDK-së paraelektorale mbeten edhe zotime të sotme. Le të mësohemi me një politikë, ku mbajtja e fjalëve është standard bazik, e ku marrja e pushtetit me çdo kusht nuk është qëllim!” – ka thënë ai.