Kompania akuzon Komunën e Vushtrrisë për kurdisje të tenderit 3.3 milionë euro për ndërtimin e rrjetit të ujësjellësit 

Aktiviteti i prokurimit, i ritenderuar për herë të tretë, në vlerë mbi 3 milionë euro, për ndërtimin e rrjetit të ujësjellësit në Vushtrri, dyshohet se është kurdisur nga Drejtoria e Prokurimit dhe Drejtoria e Urbanizmit në Komunën e Vushtrrisë. 

Më 26.08.2024, Komuna e Vushtrrisë ka shpallur tenderin “Ndërtimi i stacionit të pompimit të rrjetit primar dhe rezervuarëve të ujit në pjesën lindore të Vushtrrisë”, në vlerë mbi 3.3 milionë euro.

Mirëpo njëri prej operatorëve ekonomikë që ka aplikuar për këtë tender, pretendon se ky tender është kurdisur nga Komuna e Vushtrrisë.

Siç përshkruhet në dosjen e tenderit, kompania që ka ofertuar, “Diamanti Sh.P.K”, akuzon dy drejtori të kësaj komune, gjegjësisht, drejtorin e Prokurimit, Ilmi Azemi dhe atë të Urbanizimit, Nexhat Merovci, për kurdisje të tenderit dhe diskriminim në caktimin e kritereve për operatorët që do të ofertojnë në këtë tender.

“Ky tender është i përgatitur në tërësi (100%) për kompani të caktuara dhe kufizohet konkurrenca. Këtë tender me këto kërkesa dhe dëshmi të kërkuara ne e konsiderojmë tender të kurdisur nga departamenti i prokurimit në bashkëpunim me drejtorin e Urbanizmit, përkatësisht z. Nexhat Merovci”- shkruhet në ankesën e tyre.

Në ankesën kompanisë, ndër të tjera thuhet se si është e mundur që të publikohet projekti i ndërtimit të ujësjellësit për Lot I dhe Lot II, me të njëjtat punë dhe me të njëjtën vlerë, ndërsa me kërkesa krejtësisht të ndryshme e që këto veprime sipas tyre janë joprofesionale dhe tendencioze.

Gjithnjë sipas ankesës në dosjen e tenderit, kompania në fjalë pretendon se autoriteti kontraktues, me qëllim i ka kërkuar disa pajisje “të panevojshme” e që sipas tyre nuk do të përdoren fare në punimet që parashihen të kryhen për rrjetin, por që siç thuhet në ankesë, këto kërkesa janë bërë me qëllim për t’i detyruar operatorët e tjerë ekonomikë të heqin dorë për të konkuruar në këtë aktivitet prokurimi.

Këto kërkesa, sipas kompanisë “Diamanti Sh.P.K”, janë tendencë e autoritetit kontaktues, në këtë rast, Komunës së Vushtrrisë për të favorizuar një operator ekonomik të caktuar duke bërë kështu që të  kufizojnë konkurrencën.

Për tenderin 3.3 milionësh të Komunës së Vushtrrisë, reagime ka pasur edhe nga Lidhja Demokratike e Kosovës (LDK) në Vushtrri, të cilët përmes një komunikate kanë thënë se këtë rast do ta adresojnë në Prokurorinë Speciale për ta hetuar.

“Sipas informatave tona, specifikat e këtij tenderi janë ndryshuar të paktën tri herë gjatë procesit, gjë që tregon për kurdisje dhe favorizim. Ne, si LDK Vushtrri, do t’i dorëzojmë të gjitha faktet dhe provat përkatëse në Prokurorinë Speciale për hetime të plota dhe të pavarura”- thuhet në komunikatën e tyre.

Dy drejtorët e apostrofuar në ankesën e kompanisë drejtuar OSHP-së, kanë hedhur poshtë pretendimet përshkruara në ankesë.

Drejtori i Urbanizmit në Komunën e Vushtrrisë, Nexhat Merovci, në lidhje me ankesën e kompanisë ka deklaruar se është “shpifje”.

“Ata që e kanë përmend emrin tim… mua nuk më takon, nuk kërkohet prej Drejtorisë së Urbanizmit, ajo ka qenë një shpifje e nivelit të ulët që nuk e kam ndërmend me u marrë shumë me të, le të merret dikush tjetër”- ka thënë Merovci.

KALLXO.com ka kontaktuar drejtorin e Prokurimit në Komunën e Vushtrrisë, Ilmi Azemi, i cili, përmes një përgjigje me shkrim ka thënë për kompaninë në fjalë se ankesat e tyre janë të pavërteta dhe se sipas tij, ky operator ekonomik me këtë rast ka tentuar të shantazhoj dhe frikësoj zyrtarët e Komunës së Vushtrrisë me qëllim të imponimit të kritereve, të cilat kritere kompania në fjalë pretendon se i ka përmbushur në plotni.

Azemi ka shtuar se nëse pretendimet e kësaj kompanie janë të paargumentuara, do të ndërmarrin veprime ligjore.

Drejtori i Prokurimit në Vushtrri ka deklaruar se pas dorëzimit të ankesës së kompanisë konkuruese në OSHP, presin të merret vendim meritor.

“Lidhur me këtë AP (Aktivitet i Prokurimit) kemi pasur kërkesë për rishqyrtim pranë AK- Komuna Vushtrri, meqenëse kërkesa për rishqyrtim është refuzuar komplet si e pa bazuar dhe e pa argumentuar me fakte e prova në konditat ligjore një OE ka përdorur të drejtën ligjore dhe ka ushtru ankesë pranë OSHP-së, nga ku pritet të merret vendim meritor”- ka thënë Azemi për KALLXO.com

Ndërkaq, i pyetur se perse ky aktivitet prokurimi në vlerë 3.3 milionë euro, është ritenderuar, sipas Azemit është për shkak se njësia kontraktuese ka kërkuar që të anulohet dhe të ritenderohet në 2 Lote.

Tutje, ai ka thënë se ky aktivitet prokurimi që është ritenderim ka statusin “Në Apel” dhe gjendet për trajtim e vendimmarrje në OSHP.

Shënim: Në këtë artikull, në paragrafin e dytë, është fshirë një datë pasi në fillim të paragrafit është treguar data e shpalljes së tenderit. Koha e editimit: 08.10.2024, ora 19:22.