Ramush Haradinaj, Foto:Aleanca për Ardhmërinë e Kosovës, Facebook
Haradinaj: Dita Botërore e Refugjatëve na rikujton përpjekjen e okupatorit serb për spastrimin etnik
Kryetari i Aleancës për Ardhmërinë e Kosovës, Ramush Haradinaj në Ditën Botërore të Refugjatëve ka thënë se Shqiptarët më së miri e dinë ndjenjën e largimit me forcë nga atdheu.
Ai ka thënë se kjo ditë, Kosovës i rikujton përpjekjen e okupatorit serb për spastrimin etnik.
“Dita Botërore e Refugjatëve na rikujton përpjekjen e okupatorit serb për spastrimin etnik duke deportuar me forcë miliona shqiptarë nga Kosova gjatë Luftës Çlirimtare 1998-1999, por edhe deportimin e qindra mijëra të tjerë anekënd botës nga zonat e luftës.Shqiptarët më së miri e dinë ndjenjën e largimit me forcë nga atdheu”- ka shkruar ai.
Haradinaj ka thënë se është falënderues përjetësisht ndaj të gjithë miqve kudo nëpër botë që strehuan familjet shqiptare në ditët më të vështira.
Dita Botërore e Refugjatëve është një ditë ndërkombëtare e caktuar nga Kombet e Bashkuara për të nderuar refugjatët anembanë globit.
Çdo vit më 20 qershor festohet për forcën dhe guximin e njerëzve që janë detyruar të largohen nga vendi i tyre për t’i shpëtuar konfliktit ose persekutimit.