Gjykata merr Vendim për njërin nga të akuzuarit në rastin "AlbKings"

F.P., i akuzuar për rastin e njohur si “AlbKings”- grupit famëkeq që denigronte me fotografi të vajzave e grave,  është dënuar me 1 vjet e 9 muaj dënim me burgim efektiv dhe 5,000 euro dënim me gjobë për veprat penale “vjedhja e identitetit” dhe “shantazhi”.

Gjykata e Prishtinës këtë Vendim e ka marrë më 27.03.2025.

Në këtë rast i akuzuar është edhe E.N. dhe për të është veçuar procedura penale.

Këtë për KALLXO.com e ka konfirmuar avokati Kujtim Kërveshi, i cili përfaqëson njërën nga palët e dëmtuara.

F.P. dhe E.N. për këtë rast kanë arritur Marrëveshje për pranim të fajësisë.

Këtë rast e ka udhëhequr gjyqtari Adnan Kamberi, kurse akuza është përfaqësuar nga prokurorja Elza Bajrami.

Rrjeti social Telegram ishte njëri nga rrjetet me përdorimin më të ulët në Kosovë. Mirëpo, në fundin e vitit 2023, një grup me emrin AlbKings u hap dhe në të nisën të publikoheshin materiale kryesisht pornografike të vajzave shqiptare.

Duke përdorur materialet pornografike si kontentin kryesor, grupi do arrinte të grumbullonte rreth 100,000 njerëz – duke ndryshuar kështu edhe statistikat e përdoruesve të Telegramit në Kosovë.

Materialet e shpërndara në këtë grup ishin kryesisht pirate – përfshirë filmime nga marrëdhëniet seksuale apo fotografi nudo.

Publikimet e natyrës së tillë do të ishin normale, ndërsa administratorët lejuan që edhe numra të telefonëve të shpërndaheshin në këtë rrjet.

Anëtarë të grupit do të shpërndanin numrat e telefonit të vajzave me mbishkrime, se të njëjtat janë prostituta apo ofrojnë shërbime seksuale me pagesë.

Prokurorja Bajrami Kastrati gjatë javës së fundit të majit doli me njoftimin se shtatë persona, anëtarë të grupit janë arrestuar, në mesin e të cilëve edhe administratorët.

Njëri nga ta është nga Gjilani dhe është vetëm 19 vjeçar.

Kallxo Përnime filmoi momentin kur Policia e Kosovës hapi telefonin e tij dhe aty dëshmohej se ai ishte në mesin e personave të cilët kishin krijuar rrjetin.

Policia do të bastiste shtëpinë e tij, por atje nuk u gjetën pajisje të tjera kompjuterike.

I tërë grupi – sipas hetuesve – ishte menaxhuar nga telefoni, që po e përdorte i riu nga Gjilani.

Viktimat gazetare

Raportimet në media për grupin nisën qysh në muajin dhjetor të vitit 2023, ndërsa situata u bë më e rrezikshme kur grupi nisi të përdorej për të sulmuar gazetarët hulumtues.

Në muajin prill dhe maj 2024, Kallxo Përnime kishte publikuar dy hulumtime serioze: njërin për “ngacmime seksuale” dhe tjetrin për “dhunë në familje”.

Më pak se tri orë pas publikimit të hulumtimit për “dhunën në familje”, numri i gazetares e cila hulumtoi rastin u shpërnda në rrjet me mbishkrimin “Thirreni për naj intervistë!”.

Nga veprimi në fjalë, dhjetëra anëtarë të grupit u motivuan për të nisur fushatën me ngacmime në drejtim të gazetares.

Situata do të përsëritej edhe disa herë, pasi numri u vendos sërish me mesazhe të tjera që motivonin ngacmimin.

Pas denoncimit në Policinë e Kosovës, personi i parë i cili do të arrestohej ishte një shitës i një dyqani, i cili jetonte në Prishtinë. Një tjetër me profesion arkitekt do të arrestohej po ashtu, si “person i dyshuar për ngacmimin e gazetares”.

Ndaj këtyre personave – sipas prokurores Bajrami – do të inicohet hetim penal për veprën penale “ngacmim”, ndërsa krijuesit e “AlbKings” do të ndiqen për vepra të tjera penale.

Pse është ilegale veprimtaria e “AlbKings”?

Çdo numër personal apo e dhënë personale e dikujt që shpërndahet pa aprovimin paraprak të personit konsiderohet vepër penale, ndërsa çdo kërkesë që nuk aprovohet të mos shqetësohet dikush konsiderohet “ngacmim”.

Prokurorja e cila është pjesë e ekipit për hetimin e grupit “AlbKings”, Elza Bajrami-Kastrati, në një intervistë për Kallxo Përnime, kishte dhënë detaje në lidhje me rastin – duke bërë të qarta edhe veprimtaritë ilegale, që mund të kryejnë personat përmes këtij grupi.

“Prokuroria e Prishtinës ka nisur me u marrë me këtë rrjet, për shkak të informacioneve që kemi marrë fillimisht nga portalet vendore, që është kriju një grup në Telegram dhe në të cilin po postohen, video, fotografi dhe të dhëna të personave, kryesisht të gjinisë femërore dhe këto video e fotografi janë të ndjeshme, intime të këtyre personave. E, gjithashtu emrat, mbiemrat, numrat kontaktet e tyre, me ç’rast ka krijuar shqetësim te personat e prekur.” – kishte thënë prokurorja Bajrami-Kastrati.

Ajo kishte shpjeguar edhe pjesën ligjore të atyre të cilët shpërndajnë të dhëna të tilla.

“Është e kundërligjshme fillimisht, sepse të dhënat personale të dikujt nuk ka të drejtë t’i publikojë askush pa miratimin paraprak. Për këtë arsye, e kemi nisur edhe hetimin sipas detyrës zyrtare, në mënyrë që të ndërmirren veprimet e para hetimore, që të identifikohen personat të cilët kanë krijuar grupin dhe kanë menaxhuar atë grup, si dhe personat e tjerë të cilët janë kyçur dhe kanë keqpërdorur, apo kanë shqetësuar persona kryesisht të gjinisë femërore.” – kishte thënë Prokurorja.

“Personat të cilët kanë krijuar këtë grup e kanë krijuar për qëllimin e denigrimit të dinjitetit të personave, konkretisht të gjinisë femërore.” – kishte shpjeguar hetimin Prokurorja.