Formimi i institucioneve, Kurti përmbyll takimet me përfaqësues të komuniteteve joshumicë

Kryeministri Albin Kurti ka njoftuar se ka përmbyllur takimet me deputetë të zgjedhur dhe përfaqësues të komuniteteve joshumicë lidhur me konsitituimin e Kuvendit dhe formimin e Qeverisë.

Kurti ka thënë më 03.04.2025 se sot dhe dje së bashku me zëvendëskryeministrin Bislimi ka takuar deputetë të zgjedhur dhe përfaqësues politikë të komunitetit serb, boshnjak, egjiptian, turk, rom, ashkali dhe goran.

Në ditën e dytë (më 03.04.2025) të konsultimeve me partitë e komuniteteve joshumicë dhe përfaqësuesit e tyre të zgjedhur në Kuvend për formimin e institucioneve të legjislaturës së 9-të, kanë pritur në takime të ndara kryetarin e Partisë Demokratike Turke të Kosovës, Fikrim Damka, kryetarin e Partisë Liberale Egjiptiane, Veton Berisha, kryetaren e Unionit Socialdemokrat, Duda Balje, kryetarin e Partisë së Romëve të Bashkuar të Kosovës, Albert Kinolli, kryetarin e Koalicionit Vakat, Rasim Demiri, kryetarin e Partisë Unike Gorane, Adem Hoxha, kryetarin e Partisë së Ashkalinjëve për Integrim, Etem Arifi dhe deputetin e zgjedhur nga ky subjekt, Artan Asllani.

“Gjatë këtyre katër vjetëve të mandatit tonë të parë të plotë qeverisës kemi dëshmuar që angazhohemi për një Republikë të të gjithëve, jo vetëm shumicës. Për zhvillim të gjithmbarshëm, nga i cili përfitojmë të gjithë, pa dallim, pa diskriminim. Si shumicë, përgjegjësia na takon neve, por përfshirja, pjesëmarrja, angazhimi dhe kontributi i komuniteteve joshumicë, ka qenë dhe është thelbësor në këtë qëllim”- ka bërë të ditur Kurti, përmes një postimi në Facebook.

Kurti ka thënë se  konstituimi i Kuvendit dhe formimi i Qeverisë pa vonesa është në interes të qytetarëve.