ILUSTRIM - Ekstradimi
Ekstradohen në Itali 9 shqiptarë
Autoritetet shqiptare kanë ekstraduar sot gjatë ditës drejt Italisë 9 persona të kërkuar që janë arrestuar në Shqipëri.
Operacioni i Policisë së Shtetit u realizua në bashkëpunim me Zyrën e Bashkëpunimit Ndërkombëtar të Policisë Italiane (Criminalpol).
Siç njofton Policia e Shtetit, të ekstraduarit janë shtetas shqiptarë nga mosha 27 deri 72 vjeç, të cilët ishin fshehur në Shqipëri për t’iu shmangur urdhër-arresteve ndërkombëtare të lëshuara nga Prokuroritë e Barit, Bergamos, Chietit, Firences, Aquilës, Milanos dhe Napolit.
Personat që u ekstraduan janë kapur nga Policia e Shtetit dhe janë të përfshirë në vepra kriminale si shkelje e ligjit për narkotikët, vjedhje, grabitje, pastrimi i produkteve të veprës penale dhe organizatë kriminale me qëllim trafikun e lëndëve narkotike.