Dy të arrestuar për fajde në Prizren - Policia konfiskon armë dhe vetura

Dy persona janë arrestuar më 26.03.2025 në Prizren nën dyshimet se janë përfshirë në veprën penale “fajde” – njoftoi Policia e Kosovës.

Personat e arrestuar i takojnë moshave rreth 50 dhe 30 vjeç.

“Sektori Rajonal i Hetimeve të Drejtorisë Rajonale në Prizren së bashku me Drejtorin për Hetimin e Krimit të Organizuar dhe Krimeve të Rënda dhe në bashkëpunim me  Prokurorinë Themelore në Prizren, sot, më 26.03.2025, si rezultat i ndërmarrjes së veprimeve operative e hetimore ka realizuar operacionin policor për arrestimin e personave të dyshuar: F.K., viti i lindjes 1996, mashkull kosovar dhe B.K., viti i lindjes 1974, mashkull kosovar, me dyshimin se të njëjtit kanë qenë të përfshirë në veprën penale ‘fajde’ nga Neni 331 i KPRK-së.” – bëri të ditur Policia përmes një komunikate për media.

Gjatë operacionit për arrestimin e të dyshuarve, Policia ka konfiskuar armë zjarri dhe vetura që dyshohet se kanë lidhje me rastin.

“Gjatë operacionit policor në automjetin e njërit nga të dyshuarit është gjetur dhe konfiskuar një armë zjarri pistoletë, e llojit PIETRO BERETTA GARDONE dhe 13 fishekë. Po ashtu, janë kontrolluar shtëpitë dhe objektet e tjera përcjellëse e të dyshuarve në dy lokacione të ndryshme në Prizren, me ç ‘rast janë gjetur dhe sekuestruar dhe një pushkë ajrore e modelit N-01 S, 42 fishekë të kalibrit 9×19 mm dhe një fishek i kalibrit të panjohur, si dhe dy automjete që dyshohet të kenë lidhje me rastin.” – sqarohet mes të tjerash në komunikatë.

Pas intervistimit ndaj të dyshuarve, me Aktvendim të Prokurorit të Shtetit, është caktuar masa e ndalimit për 48 orë.