Drejtoria e Arsimit në Ferizaj: Do të monitorohet parambrëmja e shkollave të mesme
Drejtori i Arsimit në Komunën e Ferizajt, Afrim Llabjani, është prononcuar lidhur me parambrëmjen që është njoftuar se do të mbahet sot nga shkollat e mesme në Ferizaj.
Për këtë çështje, Llabjani ka thënë se kanë angazhuar Inspektoratin komunal.
“Inspektorati do të jetë monitorues i situatës brenda në objekt që të sigurohet se nuk do të ketë shpërndarje apo shërbim të pijeve alkoolike. Kjo është masa që kemi intervenuar të marrim gjatë kohës sa mbahet parambrëmja” – është përgjigjur Llabjani për KALLXO.com.
Ai gjithashtu ka bërë të ditur se Inspektorati do të jetë në koordinim me Policinë e Kosovës.
“Inspektorati do të jetë në koordinim me Policinë e Kosovës dhe në qoftë se vërehet se po bëhet diçka që nuk përkon me moshën e nxënësve atëherë me reagu” – ka thënë kreu i KDA-së në Ferizaj.
KALLXO.com ka provuar të marrë një përgjigje edhe nga Feriz Hyseni, Ushtures Detyre i Udhëheqësit të Sektorit për Inspektime në Komunën e Ferizajt por deri në publikimin e këtij artikulli nuk ka marrë përgjigje.
Më 12 janar, Komuna e Ferizaj ka njoftuar se organizimet të njohura si parambrëmje për nxënësit e klasave të 12-ta nuk janë të planifikuara nga institucionet arsimore.
Një gjë të tillë e ka theksuar edhe drejtori Afrim Llabjani.
“Ne kemi publikuar një deklaratë përmes së cilës kemi treguar se ne nuk kemi qenë në dijeni për këtë far pune. Tek dje është marrë vesh që është duke u bërë një organizim. Prej nxënësve kryesisht bëhet” – ka thënë drejtori i DKA-së
“Ne i kemi marrë ato masat që mendojmë se duhet të merren, pra njoftimi i policisë, inspektoratit. Jemi distancuar prej saj, kemi treguar që nuk është organizim institucional, është organizim privat që së paku t’iu bëjmë me dije nxënësve dhe prindërve që përgjegjësia bie mbi ndonjë institucion tjetër’ – ka shtuar ai.
Çdo vit, në fund të vitit shkollor, disa prej nxënësve të klasave të 12-ta nëpër komuna të ndryshme organizojnë një aheng të quajtur ‘parambrëmje’, që mbahet para mbrëmjeve të maturës.
