80 vjet nga Masakra e Tivarit, Instituti Albanologjik mban Tryezë shkencore

Me rastin e 80-vjetorit të Masakrës së Tivarit të viti 1945, Instituti Albanologjik në Prishtinë, gjegjësisht Dega e Historisë, në bashkëpunim me Universitetin e Prishtinës, do të organizojnë Tryezën shkencore: “Masakrat ndaj shqiptarëve në ish-Jugosllavi 1944-1945”.

Kjo Tryezë mbahet të enjten, më 03.04.2025, duke filluar nga ora 10:00, në IAP në Prishtinë.

“Kjo Tryezë është në vazhdën e trajtimit dhe ndriçimit të së vërtetës historike për krimet e bëra ndaj shqiptarëve gjatë shekullit XX dhe shpresojmë e besojmë që kumtimet e diskutimet do të japin frytet e nevojshme për zbërthime edhe më të hollësishme të kësaj periudhe të ndjeshme për popullin tonë.” – thuhet në njoftimin e IAP-së.

Në këtë Tryezë shkencore, sipas njoftimit, me kumtesat e tyre do të prezantohen studiuesit: Qerim Lita, Ibrahim Gashi, Nuridin Ahmeti, Adem Zejnullahu, Mentor Hasani, Izet Miftari, Nail Draga, Haxhi Ademi, Dorina Daiu, Oktaj Hasani dhe Rrustem Mehmeti.

Masakra e Tivarit e vitit 1945 cilësohet si një ndër ngjarjet më tragjike të popullit shqiptar, kur forcat ushtarake të ish-Jugosllavisë vranë rreth 4000 të rinj dhe burra nga Kosova.