Deklarata e rreme që pretendohet se u tha nga Kurti për presidentin Macron

O makron rri urtë se vallahi t’shkarkoj edhe ty

Më 17 tetor 2023 profili në Facebook “Diaspora Vetëvendosje” (Arkiva) publikoi një fotografi ku shihet kryeministri Albin Kurti.

Fotografia e publikuar kishte edhe një përshkrim në pjesën lartë ku thuhet: “O makron rri urtë se vallahi t’shkarkoj edhe ty”. Gjithashtu, poshtë fotografisë shkruhet: “Se Liberalizimi ka ndodh Fardje oj lop”.

Fotografia dhe përshkrimi i saj i publikuar në profilin e Facebook-ut “Diaspora Vetëvendosje” mori mbi 150 pëlqime, 27 komente e 7 shpërndarje.

Krypometri më 29/10/2023 verifikoi nëse deklarata e tillë është thënë nga Kryeministri, Albin Kurti.

Në një deklarim për Krypometër, zëdhënësi i Qeverisë së Kosovës, Përparim Kryeziu tha se deklarimi i shpërndarë nga profili në Facebook “Diaspora Vetëvendosje” është i pavërtetë.

“E pavërtetë. Një deklaratë e tillë nuk është thënë asnjëherë nga kryeministri Kurti për presidentin francez Macron”– deklaroi Kryeziu më 29/10/2023.

Krypometër kontrolloi edhe në profilin zyrtar të Kryeministrit Albin Kurti për të parë nëse një deklaratë e tillë është thënë. Në publikimet nga data 1 shtator 2023 deri me datë 29 tetor 2023 nuk është gjetur një përmbajtje e tillë. 

Me 17 tetor 2023 Presidenti Francez Macron vizitoi Tiranën. Atje ai u takua me kryeministrin Edi Rama dhe gjatë fjalimeve pati adresime edhe për Kosovën. 

Gjatë konferencës për shtyp, përkthyesja zyrtare e keqinterpretoi një pjesë të deklaratës së Macron për qështjen e vizave për Kosovë. Deklarata e Macron më pas shërbeu për një varg lajmesh të rreme të prodhuara nga kjo konferencë. 

Lajmet më pas u demantuan me burime zyrtare, përfshirë sqarimet nga qeveria Franceze.