Sasitë e tepërta të vitaminave C dhe E mund ta nxisin përhapjen e kancerit të mushkërive

Suplementet apo vitaminat dietike në formën e antioksidantëve, të tilla si vitaminat C dhe E, mund të nxisin pa dashje rritjen dhe përhapjen e kancerit të mushkërive duke e stimuluar formimin e enëve të gjakut brenda tumorit, ka treguar një studim i ri shkencor i kryer tek minjtë. Ky zbulim befasues ka ngritur shqetësime për përdorimin e këtyre suplementeve dietike te pacientët që vuajnë nga kjo formë kanceri.

Martin Bergö dhe kolegët e tij në Institutin Karolinska në Suedi kishin zbuluar më parë një lidhje shqetësuese midis suplementeve antioksidante dhe përhapjes së kancerit të mushkërive te minjtë. Për të hetuar më thellë këtë fenomen, një ekip i ri shkencëtarësh ka kryer eksperimente gjithëpërfshirëse që përfshinin minj me kancer të mushkërive specifike për miun dhe ata të implantuar me qeliza të kancerit të mushkërive njerëzore.

Çfarë tregoi hulumtimi?

Këto eksperimente përfshinin dhënien e dozave në rritje të vitaminës C, të cilën minjtë e prodhojnë natyrshëm, së bashku me vitaminën E dhe n-acetilcisteinë të marrë nga dieta e tyre. Rezultati ishte një rritje e konsiderueshme e niveleve të antioksidantëve tek minjtë, duke tejkaluar atë që nevojitej për mirëqenien e tyre.

Shkencëtarët suedezë kanë vëzhguar një lidhje të drejtpërdrejtë midis dozave më të larta të antioksidantëve dhe rritjes së formimit të enëve të gjakut brenda tumoreve, pavarësisht nëse ata kishin kancer të mushkërive të miut ose të njeriut. Edhe pse kjo sugjeron një lidhje të mundshme midis antioksidantëve dhe rritjes dhe përhapjes së tumorit, autorët e studimit të ri, të botuar në The Journal of Clinical Investigation, nuk  i kanë vazhduar më tej hetimet këtë aspekt.

Vërejtje e rëndësishme

Bergö e vë theksin tek rëndësia e mosndryshimit të dietës bazuar vetëm në këtë hulumtim të ri nëse një person ka ndonjë formë kanceri.

Nëse i largoni të gjithë antioksidantët në ushqimin tuaj, do të sëmureni për një sërë arsyesh, siç është mungesa e vitaminave, dhe kjo do të ndikonte në kancer. Jemi të fokusuar në rritjen e dozave të suplementeve ushqimore, mbi nivelet e nevojshme, shpjegon eksperti suedez.

Antioksidantët i neutralizojnë radikalet e lira të oksigjenit

Në pjesën e dytë të eksperimenteve të tyre, shkencëtarët i kanë ekzaminuar organoidet e tumorit të mushkërive të njeriut dhe të miut, domethënë grupe qelizash të rritura në laborator. Pas ekspozimit të këtyre organoideve ndaj dozave më të larta se të nevojshme të tre antioksidantëve, ata zbuluan se këta antioksidantë i kanë neutralizuar radikalet e lira të oksigjenit brenda organoideve.

Hulumtimet e mëparshme nga ekipi i Bergo implikuan një proteinë të quajtur BACH1 në rritjen e tumorit pas plotësimit të vitaminës E dhe n-acetilcisteinës. Studimi i fundit sugjeron që BACH1 bëhet aktiv kur nivelet e radikaleve të lira të oksigjenit reduktohen, duke çuar në nxitjen e formimit të enëve të gjakut.

Rruga drejt qasjeve të reja në trajtimin e formave specifike të kancerit

Bergö beson se kërkimet e mëtejshme shkencore mund të hapin derën për qasje të reja për trajtimin e disa llojeve të kancerit. Ndërkohë që frenuesit e rritjes së enëve të gjakut përdoren zakonisht për ta trajtuar kancerin, ata mund të shkaktojnë efekte anësore serioze, duke përfshirë mpiksjen e gjakut. Këta frenues mund të rezultojnë më efektivë te njerëzit me nivele të larta të BACH1 në tumoret e tyre, gjë që mund të jetë për shkak të suplementeve dhe mutacioneve gjenetike.

Megjithëse eksperimentet u fokusuan kryesisht në tumoret e kancerit të mushkërive, shkencëtarët suedezë kërkuan gjithashtu bazat e të dhënave gjenomike për të identifikuar lloje të tjera kanceri me nivele të larta të BACH1. Ata zbuluan se tumoret e veshkave dhe të gjirit shpesh tregojnë nivele të larta të BACH1. Kjo sugjeron që këto kushte mund të përfitojnë gjithashtu nga terapitë e synuara që përfshijnë frenuesit e rritjes së enëve të gjakut, të cilat mund të testohen tek individët./New Scientist

Përgatiti: Nuhi Shala