U raportua se dy serbë janë rrahur nga Policia, kjo e fundit e demanton

Gazetari Branislav Kërstiq nga veriu ka shkruar disa orë më parë se dy fëmijë të mitur janë rrahur nga Policia e Kosovës në Zhitkovc.

Në lidhje me këtë deklaratë të gazetarit Kërstiq ka reaguar Policia e Kosovës, të cilët i kanë demantuar këto informacione.

Policia ka njoftuar se sot pasdite në rrugën Izvor-Banjska, kanë hasur duke qarkulluar dy mjete (motorë) katër rrotësh me të cilët kanë qenë pesë persona.

Mirëpo, sipas Policisë, njëri motor me dy persona ka vazhduar duke u shmangur sinjalizimit policor për tu ndalur dhe ka ikur në një rrugë mali, kurse tjetri ka vazhduar shmangien në drejtim tjetër në një teren të pa përshtatshëm, por zyrtarët policorë janë vënë në përcjellje këmbë, pasi që ka qenë tereni i pa përshtatshëm për të ikur larg, dhe diku rreth 150 metra nga rruga kryesore kanë hasur motorin në fjalë dhe dy personat.

Kurse në një distancë prej rreth 350 metra, zyrtarët tjerë policorë kanë hasur personin e tretë, i cili kishte ikur në këmbë. Në atë lokacion është paraqitur edhe një grua, e cila ka deklaruar se është nëna e dy personave të ndaluar nga policia.

Pas kontrollimit të personave dhe të mjetit (motorit), si dhe pas realizimit të procedurave policore, të tre personat janë liruar.

Policia ka thënë se në këtë rast nuk ka pasur ndonjë sjellje jo profesionale policore.

“Vlen të potencohet se veprimet policore janë realizuar konform procedurave të parapara ligjore dhe në asnjë rast nuk ka pasur ndonjë sjellje jo profesionale policore. Deklarimet e ndryshme se kinse policia i ka rrahur dy prej këtyre personave nuk qëndrojnë dhe janë të pavërteta” – ka thënë Policia.

“Policia e Kosovës, sipas detyrës zyrtare trajton çdo ankesë të mundshme, që adresohet ndaj PK-së dhe po ashtu njofton Inspektoratin Policor (IPK). Policia e Kosovës, do të vazhdojë të mbajë të informuar opinionin me informata zyrtare dhe njëkohësisht fton mediat për bashkëpunim të mëtejmë” – ka shtuar Policia.