Sulmi që la të vdekur 137 persona në Moskë, BBC publikon pamje të të dyshuarve me fytyra të enjtura, sy të nxirë e veshë të fashuar

Rusia ka akuzuar katër persona për sulmin në një sallë koncertesh në Moskë, gjatë të cilit mbetën të vrarë të paktën 137 persona. Katër personat e dyshuar u duk se ishin rrahur derisa njëri prej tyre u soll në gjykatë në një karrige me rrota, raporton BBC. Ata u akuzuan për kryerjen e një akti terrorist.

Grupi Shteti Islamik, ose IS, tha se kreu sulmin e së premtes në Sallën e qytetit Crocus dhe postoi video dhe prova. Zyrtarët rusë kanë pretenduar, pa prova, përfshirje të Ukrainës. Kievi thotë se pretendimi është “absurd”.

Nga autoritetet ruse u tha se katër të dyshuarit janë Dalerdzhon Mirzoyev, Saidakrami Murodali Rachabalizoda, Shamsidin Fariduni dhe Muhammadsobir Fayzov.

Videot e seancave brutale të marrjes në pyetje u zbuluan me sa duket nga forcat ruse të sigurisë dhe raportet sugjerojnë se të paktën një prej tyre kishte pësuar “shok elektrike”.

Të dyshuarit që gjykata i identifikoi si Mirzoyev dhe Rachabalizoda kishin sy të nxirë dhe veshi i këtij të fundit ishte shumë i fashuar – thuhet se ishte prerë pjesërisht gjatë arrestimit të tij. Mirzojev gjithashtu dukej se kishte një qese plastike të grisur të mbështjellë rreth qafës së tij.

Fytyra e burrit të identifikuar si Fariduni ishte e enjtur, ndërsa burri i quajtur Fayzov dukej se humbi vetëdijen ndërsa u soll në gjykatë në një karrige me rrota i veshur me një veshje të hollë spitali. Atij dukej se i mungonte një sy, sipas agjencisë së lajmeve Reuters.

Të gjithë u mbajtën në një kabinë xhami dhe ruheshin nga policia e maskuar gjatë kohës që ishin në gjykatë.

Një deklaratë e gjykatës në shërbimin e mesazheve Telegram tha se Mirzoyev “e kishte pranuar plotësisht fajin e tij”, ndërsa Rachabalizoda gjithashtu “pranoi fajin”. Gjykata tha gjithashtu se të katërt do të mbahen në paraburgim deri të paktën më 22 maj.

Të dyshuarit u identifikuan si shtetas të Taxhikistanit, tha agjencia shtetërore ruse e lajmeve Tass.

Dhjetë persona të tjerë janë arrestuar në Rusi të dyshuar se kanë ndihmuar sulmin.

Në mbrëmjen e 22.03.2024, katër persona të armatosur sulmuan një sallë të koncerteve në Krasnogorsk, një pjesën periferike veriore të Moskës, dhe filluan të qëllojnë mbi disa prej rreth 6,000 njerëzve që po ndiqnin një koncert rock. Sulmuesit vunë gjithashtu zjarr, i cili përfshiu sallën dhe shkaktoi shembjen e çatisë.

Autoritetet ruse thanë se 137 njerëz u vranë dhe më shumë se 100 u plagosën, me 60 ende në gjendje të rëndë.

Ekipet e shpëtimit po vazhdojnë të kërkojnë në rrënojat e sallës së koncerteve për viktimat dhe zyrtarët rajonalë thanë se operacioni do të vazhdojë deri të martën pasdite, 27.03.2024.

Të dyshuarit që u paraqitën në gjykatë më 24.03.2024, u arrestuan në rajonin Bryansk rreth 14 orë pas sulmit, tha Shërbimi Federal i Sigurisë së Rusisë (FSB). Bryansk është rreth 400 km në jug-perëndim të Moskës.

Përgatiti: Visar Hasallari