Foto: Tomas Szunyog, X
Shefi i BE-së në Kosovë takon kryetarin e KQZ-së, flasin për peticionin në katër komunat në veri
Shefi i Zyrës së Bashkimit Europian në Kosovë, Tomas Szunyog është takuar sot me kryetarin e Komisionit Qendror të Zgjedhjeve (KQZ) Kreshnik Radoniqi.
Szunyog ka thënë se në këtë takim kanë diskutuar për procesin e shkarkimit të kryetarëve në komunat në veri të Kosovës.
“Diskutuam për procesin e tërheqjes së kryetarëve në komunat veriore me kryesuesin e KQZ-së. Derisa e përgëzova për përgjigjen e shpejtë ndaj kërkesave të Grupeve Nismëtare, u interesova për hapat e ardhshëm dhe përgatitjet e brendshme të KQZ-së për votimin e tërheqjes nëse kalohet pragu 20 përqind”- ka shkruar Szunyog në rrjetin social “X”.
Discussed the mayoral recall process in the northern municipalities with CEC’s Chair. While commending him for the prompt response to the Initiator Groups’ requests, I inquired about the next steps & CEC’s internal preparations for the recall vote if the 20% threshold is passed. pic.twitter.com/A8ZJdtPgi9
— Ambassador Tomáš Szunyog (@EUAmbKS) January 23, 2024
Qytetarët e 4 komunave në veri përmes nënshkrimeve të tyre po kërkojnë që të shkarkohen katër kryetarët e komunave, të cilët janë shqiptarë.
Më 19 janar 2024, në Mitrovicën e Veriut ka përfunduar mbledhja e nënshkrimeve të peticionit për shkarkimin e kryetarit të komunës nga radhët e komunitetit shqiptar, Erden Atiq.
Ndërsa, peticioni i nënshkruar për inicimin e shkarkimit të kryetarit të Leposaviqit, Lulzim Hetemi, është dorëzuar dje në Komunë.
Komisioni Qendror i Zgjedhjeve ka publikuar numrin e nënshkrimeve që duhet për të iniciuar shkarkimin e kryetarëve të komunave në veri të Kosovës.
Sipas këtyre të dhënave, në Mitrovicë e Veriut duhen 3 mijë e 640 nënshkrime, në Leposaviq 2 mijë e 689, në Zubin Potok 1 mijë e 347 dhe në Zveçan duhen 1 mijë e 411 nënshkrime.
Javën e kaluar ekipi i KALLXO.com ka raportuar në vazhdimësi nga veriu i vendit për procesin e nënshkrimit të peticioneve.