Arkiv - Pamje nga takimi i Rrjetit të Grupeve të Grave të Kosovës - Foto: Facebook
RrGK: Amnistimi i krimeve të luftës, i papranueshëm
Me rastin e shënimit të 27 prillit, Ditës Kombëtare të Personave të Pagjetur, Rrjeti i Grave të Kosovës (RrGK) ka kujtuar, 1,641 gra e burra, fëmijë e të moshuar të Kosovës, fati i të cilëve mbetet ende i panjohur.
“Që prej 21 vitesh, më të dashurit e tyre, më zemër të ngrirë dhe shpirt të vrarë janë në pritje. Ndërsa mungesa e vullnetit politik të shtetit përgjegjës vazhdon t’ua mohojë të drejtën për të ditur, të drejtën për të vërtetën, të drejtën për drejësi”, thotë RrGK.
Rjeti i Grave të Kosovës po ashtu thotë se përpjekjet e shoqërisë duhet të shkojnë në drejtim të mbështetjes, të kujtimit dhe nderimit të viktimave të luftës, të të zhdukurve, të personave të dhunuar gjatë luftës.
“Ndërsa, kërkesa për drejtësi duhet të jetë në qendër të të gjitha përpjekjeve për ndërtimin e paqes midis dy shoqërive. Përpjekjet për të harruar të kaluarën nuk do të rezultojnë të suksesshme, pasi nuk bazohen në të drejtat e njeriut dhe nuk bazohen në të drejtën për drejtësi. Pa drejtësi nuk mund të ketë paqe”, është thënë më tej.
Përmes kësaj letre, RrGK thotë se nuk pajtohen me idenë për amnistim të viktimave të luftës.
“Për ne është e papranueshme të flitet për aministi, kur tash e dy dekada jemi në pritje të drejtësisë. Drejtësi për viktimat e luftës, për të pagjeturit, për dhunimet seksuale dhe për të gjitha krimet e luftës që kanë ndodhur në Kosovë gjatë viteve 1998-1999”, thuhet më tej.
“Marrëveshjet e paqes nuk mund të integrojnë amnistinë për këto krime pasi janë ndërkombëtarisht të ndëshkuara dhe tentativat për mohim të drejtësisë shkojnë kundër së drejtës ndërkombëtare dhe konventave të OKB-së. Është obligim i shteteve të mbrojnë të drejtat e njeriut, kurse mohimi i drejtësisë për krimet e kryera është mohim i kësaj të drejte”, thotë RrGK.
RrGK ka shtuar se si shoqëri duhet të bëjmë përpjekje që kërkesa jonë për drejtësi, të na bashkojë si komunitet shumicë dhe komunitete pakicë të shtetit tonë, duke mos na kthyer kundër njëri-tjetrit.
“Duhet të bashkohemi në kërkesën tonë për të ndëshkuar të gjithë ata që kryen krime të luftës, gjenocid, si dhe krime kundër njerëzimit”, përfundon reagimi i tyre.
Në prag të Ditës së të Pagjeturve, familjarë të viktimave dhe vetë njerëz që kanë vuajtur dhe kanë pësuar nga krimet nga regjimi serb gjatë luftës së fundit, janë përballur në opinion me deklarata për amnistinë e krimeve të luftës.
Ish-drejtori i Klan Kosovës, Baton Haxhiu duke folur për një marrëveshje mes Kosovës dhe Serbisë ka thënë se një marrëveshje e tillë do të duhej t’i ketë 3 elemente: 1. Gjykata Speciale dhe zhbërja e saj, 2. Amnistia në të dy vendet, pasi që pas 20 vjetësh s’ka pse dënohen njerëzit, dhe 3. Definimi i veriut, çka duam me veriun.
Në anën tjetër, më 27 prill, sot, është organizuar një aksion simbolik në përvjetorin e të pagjeturve, në të cilën ftohen të gjithë qytetarët që të i bashkohen thirrjes që sonte, në orën 20:00, të fikin drita për dy minuta.
