Qytetarët në hall me ujërat e zeza në "Rrugën B", Komuna e Prishtinës po planifikon ndërtimin e segmentit të ri të rrjetit të kanalizimit

Qytetarë që banojnë në objektet banesore por edhe të tillë që punojnë në lokalet që gjenden buzë “Rrugës B” në Prishtinë janë në hall me ujërat e zeza që përshkojnë një pjesë të kësaj rruge por edhe trotuaret.

Madje, ka qytetarë që nuk po arrijnë të shfrytëzojnë pronat e tyre, për shkak se ujërat e zeza kanë vërshuar edhe bodrumet e ndërtesave.

Jeton Osmani thot se garazhet që i ka në bodrumin e ndërtesës nuk po arrin t’i shfrytëzojë për shkak se po grumbullohen ujërat e zeza.

Ai ankohet se edhe në bazë nuk po ndihen mirë për shkak të kundërmimit që vjen nga bodrumi.

“Kur e kam ble banesën i kam ble edhe dy garazhe me mendimin që e kam banesën këtu dhe më duhen edhe garazhet, por kurrë nuk kam mundur t’i shfrytëzoj, për shkak se gjithmonë ka qenë kështu” – është shprehur ky qytetar.

Ndërsa, Drejtori i Investimeve Kapitale në Komunën e Prishtinës, Sokol Havolli, për KALLXO.com ka njoftuar se intervenimet për evitimin e këtij problemi kishin filluar mirëpo ato janë ndalur pasi puseta ndodhet në pronë private dhe vazhdimin e tyre nuk e ka lejuar pronari i pronës.

“Ndërhyrjet në kuadër të pronës së tij kemi qenë të detyruar t’i ndërpresim dhe kjo është arsyeja pse duhet të ndërtojmë një segment të ri të rrjetit të kanalizimit”- tha Havolli.

Tutje, ai njoftoi së ekipet përgjegjëse kanë dalë në terren dhe kanë vlerësuar gjendjen, dhe se aktualisht po punohet në projektin për ndërtimin e segmentit të ri të rrjetit të kanalizimit në këtë pjesë të “Rrugës B”.

“Jemi duke e projektuar ndërhyrjen sepse është një ndërhyrje e madhe, duhet të bëhet një zëvendësim prej pjesës së rrjetit deri në 60-70 metra dhe sapo ta kemi projektin do ta evitojmë këtë problem”- është shprehur drejtori Havolli.

Ndër të tjera, Havolli tha se ndër prioritetet e Komunës është përmirësimi i infrastrukturës së rrjetit të kanalizimit në të gjitha pjesët e kryeqytetit.