Policia shqiptare arreston tre kosovarë, dyshohen për trafikim me armë dhe lëndë eksplozive

Policia e Shqipërisë ka njoftuar për finalizimin e dy operacioneve në kuadër të planit mbarëkombëtar të koduar “Sundimi i ligjit”.

Në rastin e parë, Policia ka arrestuar tre kosovarë në flagrancë ndërsa në kërkim u shpallën edhe dy të tjerë.

R. M., 20 vjeç, L. P., 25 vjeç dhe Sh. H., 27 vjeç u kapën në flagrancë duke trafikuar armë dhe lëndë eksplozive nga Kosova në Shqipëri.

Gjatë operacionit u sekuestruan 203 kallëpe me lëndë plasëse të dyshuar tritol TNT, me peshë 46 kg.

“Kjo sasi ishte destinuar për t’u përdorur nga grupe kriminale të ndryshme, në territorin e Republikës së Shqipërisë”- tha drejtori i Drejtorisë Vendore të Policisë- Tiranë, Tonin Vocaj.

Në kuadër të këtij operacioni janë sekuestruar edhe 3 celularë dhe 1 automjet.

“Më parë, në kuadër të këtij procedimi janë zhvilluar 2 operacione, janë vënë në pranga 2 shtetas dhe janë sekuestruar 4 armë zjarri – pistoleta, së bashku me krehra dhe municione luftarake, të cilat janë trafikuar nga Kosova në drejtim të Shqipërisë”- ka bërë të ditur Vocaj.

Ndërsa në operacionin e dytë, policia ka arrestuar tre shtetas shqiptar, K. A., E. F., dhe R. Z., të cilët dyshohet se kanë lidhje me shpërthimin e një lënde plasëse në një zyre noteriale më 30 janar të këtij viti.

“Nga veprimet hetimore të deritanishme ka rezultuar se këta shtetas e kanë vendosur lëndën eksplozive, kundrejt pagesës” – tha drejtori i Drejtorisë Vendore të Policisë – Tiranë.

Tre të arrestuarit dyshohet se më 30 janar kishin vendosur lëndë plasëse në një zyrë noteriale dhe pas ngjarjes kanë lëvizur me motomjetin e E. F., Më pas, motomjetin e kanë braktisur në liqenin e Farkës dhe pas kësaj janë larguar me automjetin tip “Audi”, të arrestuarit K. A.

Në lidhje me këtë ngjarje Policia ka shpallur në kërkim dhe dy persona të tjerë.