Plenkoviq uron Kosovën për hapin drejt Këshillit të Europës: Kroacia do vazhdojë të ju mbështesë në të gjitha organizatat ndërkombëtare
Kryeministri i Kroacisë, Andrej Plenkoviq, ka mirëpritur vendimin e Komisionit të Asamblesë Parlamentare të Këshillit të Evropës për të rekomanduar anëtarësimin e Kosovës në Këshillin e Europës.
Plenkoviq ka deklaruar se Kroacia do të vazhdojë ta mbështesë Kosovën në të gjitha organizatat ndërkombëtare.
“Mirëpres vendimin e sotëm të Komisionit të Asamblesë Parlamentare të Këshillit të Evropës për të rekomanduar anëtarësimin e Kosovës në Këshillin e Europës. Kroacia do të vazhdojë të mbështesë Kosovën në të gjitha organizatat ndërkombëtare”- ka shkruar Plenkoviq në rrjetin social “X”.
I welcome today’s decision by the Council of Europe’s Parliamentary Assembly Committee to recommend that Kosovo joins @coe! 🇭🇷 will continue to support 🇽🇰 in all international organizations.
— Andrej Plenković (@AndrejPlenkovic) March 27, 2024
Në mbledhjen e mbajtur nga Komiteti i Çështjeve Politike i Asamblesë Parlamentare të Këshillit të Europës në Paris më 27.03.2024 është rekomanduar që Kosova të ftohet për t’u bërë anëtare e Këshillit të Europës.
“Hapi tjetër: një debat plenar – që pritet më 18 prill – dhe një votim nga Kuvendi i plotë mbi Opinionin e tij statutor”- ka njoftuar Asambleja Parlamentare e Këshillit të Europës në rrjetin social “X”.
Anëtarët e delegacionit të Kosovës në Këshill të Europës kanë njoftuar që është votuar në favor të Kosovës raport- opinioni i raportueses Dora Bakoyannis në mbledhjen e Komisionit për Çështje Politike dhe Demokraci, me 31 vota për dhe 4 kundër.
Kosova e paraqiti kërkesën për anëtarësim në Këshillin e Europës më 12.05.2022.
Në prill të vitit 2023, pas një mbledhjeje të jashtëzakonshme, Komiteti Ministror vendosi që ta dërgojë në Asamblenë Parlamentare të Këshillit të Europës kërkesën për anëtarësimin e Kosovës në këtë organizatë.
Ditë më parë, tre liderët e shtetit: presidentja Vjosa Osmani, kryeparlamentari Glauk Konjufa dhe kryeministri Albin Kurti i kanë dërguar një letër raportueses për Kosovën, Bakojanis, duke u zotuar se do t`i zbatojnë të gjitha masat që i kërkohen Kosovës pasi të bëhet pjesë e Këshillit të Europës.
Këshilli i Europës i ka 46 anëtarë, nga 47 që i kishte para përjashtimit të Rusisë.
