Paralajmërohen masa më të rrepta nga Qeveria për COVID-19

Kryeministri i Republikës së Kosovës, Avdullah Hoti, i shoqëruar nga ministri i Shëndetësisë, Armend Zemaj, ka marrë sot pjesë në takimin e radhës të Komitetit për koordinimin dhe vlerësimin e situatës emergjente me koronavirus.

Në këtë takim u diskutua për gjendjen e rëndë të krijuar si pasojë e kësaj pandemie dhe veprimet që duhet të ndërmarrin institucionet e vendit për menaxhimin dhe parandalimin e saj.

“Përveç përkushtimit të plotë të personelit shëndetësor, që është në vijën e parë të frontit në betejën kundër pandemisë COVID -19, në këtë takim u kërkua sërish që të gjithë qytetarët të jenë të kujdesshëm, të mbajnë largësinë fizike, t’i bartin maskat mbrojtëse dhe ta mbajnë higjienën personale, sepse këto janë mjetet më efikase për t’u mbrojtur nga ky infeksion i rrezikshëm”, thuhet në njoftimin e Qeverisë.

Tutje është bërë e ditur se Hoti ka kërkuar nga të gjitha institucionet relevante të vendit, si në nivelin qendror, ashtu edhe në atë lokal, t’i bashkërendojnë veprimet e tyre, në mënyrë që qytetarët të informohen për masat mbrojtëse të parapara me vendimet e Qeverisë se Republikës së Kosovës, si dhe me udhëzimet e Institutit Kombëtar të Shëndetësisë Publike.

“Edhe në këtë takim, kryeministri Hoti, theksoi vendosmërinë e Qeverisë së Kosovës për të ndërhyrë kudo që ka nevojë me pajisje teknike, qoftë me shtimin e numrit të personelit shëndetësor, në mënyrë që pacientëve të shtrirë në spitalet e Kosovës t’u ofrohet e gjithë ndihma e nevojshme profesional dhe kujdesi human për të cilin ata kanë nevojë”, thuhet në njoftim.

Tutje është bërë e ditur se pritet që të ndërmerren masa më të rrepta për kufizimin e lëvizjes së qytetarëve, duke parë numrin e të infektuarve nga Covid-19 në vendin tonë.

“Meqenëse ditëve të fundit numri i të infektuarve është shtuar së tepërmi, madje duke pasur pasoja të rënda edhe me jetë njerëzish, nga diskutimet e pjesëmarrësve doli se Qeveria dhe institucionet e tjera të vendit nuk mund ta përjashtojnë as marrjen e masave më të rrepta të kufizimit të lëvizjes së qytetarëve”, thuhet në njoftim.

Ministri i Shëndetësisë, Armend Zemaj në këtë takim ka prezantuar hapat konkret që Ministria e Shëndetësisë ka ndërmarrë këto ditë për menaxhimin dhe parandalimin e pandemisë COVID-19, ndërsa drejtuesit e institucioneve shëndetësore të vendit kanë raportuar për gjendjen e të prekurve, duke paraqitur të dhënat e përditësuara për numrin e të infektuarve, si dhe të përpjekjeve që po bëjnë mjekët dhe infermierët tanë për t’u ndihmuar pacientëve për ta përballuar me sukses sëmundjen.