Oliver Varhelyi - Foto: REL/AFP
Oliver Varhelyi zgjidhet komisionar i Zgjerimit të BE-së
Parlamenti Europian e miratoi Oliver Varhelyin për Komisionar të Zgjerimit të Bashkimit Europian.
Varhelyi, kandidat nga Hungaria, ka qenë në seancë dëgjimore javën e kaluar, por nuk ka arritur t’i bindë plotësisht ligjvënësit e Parlamentit Europian se është i gatshëm për postin.
Atij i është dashur të përgjigjet edhe në pyetje shtesë me shkrim.
Përgjigjet janë dërguar paraditen e së hënës dhe kanë qenë të mjaftueshme që deputetët të konfirmojnë emërimin e tij.
Varhelyi është kandidati i dytë nga Hungaria për komisionar europian.
Para tij ka qenë Laszlo Troscanyi, i cili është refuzuar nga Parlamenti Europian për shkak të konflikteve të interesit.
Në total, Parlamenti Europian ka refuzuar tre kandidatë: nga Hungaria, Rumania dhe Franca.
Kjo ka qenë edhe arsyeja përse përbërja e re e Komisionit Europian nuk e ka nisur punën më 1 nëntor, ashtu siç ka qenë e planifikuar fillimisht.
Tre kandidatë të rinj nga këto vende e kanë marrë tashmë konfirmimin e Parlamentit Europian, i cili pritet të votojë për paketën e plotë të Komisionit të ri Europian, më 27 nëntor./REL