Një këshilltar i shefit ushtarak të Ukrainës vdes nga një shpërthim në ditëlindjen e tij
Një këshilltar i afërt ushtarak i komandantit të përgjithshëm të ushtrisë së Ukrainës është vrarë pasi shpërtheu një granatë mes dhuratave të ditëlindjes. “Në rrethana tragjike, ndihmësi dhe miku im i ngushtë, major Gennadiy Chastiakov, u vra… në ditëlindjen e tij”- shkroi në internet gjenerali Valery Zaluzhny.
Vdekja fillimisht u raportua si një atentat i dyshuar, por më vonë dolën detaje që sugjeronin se kishte një ngatërresë dhe granata ishte mes dhuratave të ditëlindjes dhe u nis gabimisht. Djali i Chastiakov, 13 vjeç, u raportua gjithashtu se i plagosur rëndë.
Presidenti i Ukrainës, Volodymyr Zelenskiy, ka thënë se vdekja e të paktën 19 ushtarëve në një sulm me raketa ruse në një ceremoni ushtarake ishte një “tragjedi që mund të ishte shmangur”. Raporte të tjera sugjerojnë se numri i të vdekurve mund të jetë shumë më i lartë, ndërsa shefat e mbrojtjes janë nën presion mbi organizimin e ngjarjes në një fshat të vijës së parë të cenueshme ndaj sulmit.
Zelenskiy ka thënë se është e papërgjegjshme të flitet për mbajtjen e zgjedhjeve në Ukrainë në kohë lufte dhe bëri thirrje për unitet për t’i shmangur diskutimet e kota politike.
Në SHBA, disa republikanë të Senatit kanë lëshuar një sërë propozimesh për sigurinë kufitare të SHBA-së si kusht për dërgimin e më shumë ndihmave në Ukrainë, duke paraqitur një projekt-plan që përfshin rifillimin e ndërtimit në pjesë të murit kufitar me Meksikën.
Presidenti rus Vladimir Putin ka vendosur të kandidojë në zgjedhjet presidenciale të marsit, një lëvizje që do ta mbante atë në pushtet të paktën deri në vitin 2030, pasi thuhet se ndjen se duhet ta udhëheqë Rusinë në periudhën e saj më të rrezikshme në dekada, thanë burimet për Reuters.
Radio Evropa e Lirë ka thënë se beson se Rusia mund ta ketë marrë “peng” një nga gazetarët e saj për një shkëmbim të mundshëm të të burgosurve me SHBA-në dhe po i bën thirrje Moskës që të mos e trajtojë atë mizorisht, ka thënë presidenti në detyrë i transmetuesit Evropa e Lirë.
Disa dhjetëra pronarë të kompanive të transportit i kanë bllokuar tri pika kufitare polake me Ukrainën në shenjë proteste ndaj asaj që ata thonë se është konkurrencë e pandershme nga bizneset e saj.
Eksportet e drithërave të Ukrainës kanë rënë me pothuajse një të tretën krahasuar me vitin e kaluar, tregojnë të dhënat e ministrisë së bujqësisë, në 9.8 milionë tonë deri më tani në sezonin korrik 2023-qershor të vitit 2024. Ministria ukrainase e bujqësisë ka thënë se deri në këtë pikë vitin e kaluar, Ukraina ka eksportuar 14.3 milion tonë./The Guardian
Përgatiti: Nuhi Shala
