Në Shri Lankë shpallet gjendje e jashtëzakonshme
Kryeministri i Shri Lankës, Ranil Wickremesinghe, e ka shpallur gjendjen e jashtëzakonshme në vend.
Ai është emëruar ushtrues detyre i presidentit, sipas kryetarit të parlamentit, pasi presidenti Gotabaya Rajapaksa u largua nga vendi.
Policia ka hedhur gaz lotsjellës në përpjekje për t’i shpërndarë protestuesit jashtë zyrës së kryeministrit.
Një shtetrrethim është vendosur në Provincën Perëndimore, e cila përfshin kryeqytetin, Colombo.
Presidenti Gotabaya Rajapaksa u largua nga vendi me një avion ushtarak – thuhet se shoqërohej nga gruaja e tij – disa ditë pasi demonstruesit e pushtuan rezidencën e tij.
Ai ishte zotuar të largohej të mërkurën mes protestave masive për krizën më të keqe ekonomike të ishullit në dekada.
Për muaj të tërë njerëzit janë përballur me ndërprerjet e përditshme të energjisë dhe mungesat e gjërave bazë si karburanti, ushqimi dhe ilaçet.
Mijëra protestues kanë dalë në rrugë të zemëruar javët e fundit, dhe shumica prej tyre e kanë fajësuar familjen Rajapaksa dhe qeverinë e tyre për situatën./BBC
Përgatiti: Nuhi Shala