Foto: Denis Sllovinja
Kuvendi i Kosovës shqyrton sot statutin e ri të Universitetit të Prishtinës
Deputetët e Kuvendi të Kosovës në seancën e sotme, më 23.05.2024, do të shqyrtojnë statutin e ri të Universitetit të Prishtinës.
Statuti i ri i UP-së u miratua më 14.05.2024 në Komisionin për Arsim, Shkencë, Teknologji, Inovacion, Kulturё, Rini dhe Sport.
Në Komision, deputetja nga radhët e LDK-së, Vlora Dumoshi e ka pyetur ministren e Arsimit, Arbërie Nagavci nëse është për ndërrim të emrit të universitetit.
Ministrja Arbërie Nagavci ka thënë se e respekton draft-statutin të cilin e ka sjell universiteti.
KALLXO.com kishte raportuar në lidhje me polemikat për emrin e UP-së.
Polemikat për heqjen ose lënien e emrit ‘Hasan Prishtina’ në emërtimin e UP-së
Që nga viti 2011, kur edhe ishte miratuar Statuti i parë i UP-së, versioni aktual ka pësuar disa ndryshime.
Një prej ndryshimeve, sipas versionit të propozuar është edhe mënyra e zgjedhjes së rektorit.
Sipas këtij propozimi, konsiderohet e papajtueshme me pozitën e rektorit nëse kandidati ka ushtruar një funksion partiak apo politik në pesë vjetët e fundit nga dita e shpalljes së konkursit.
Po ashtu ky Statut pritet t’i pamundësojë të gjithë atyre që në 10 vitet e fundit kanë ushtruar aktivitet të lartë partiak apo politik që të zgjidhen anëtarë në Këshillin Drejtues.
Po ashtu edhe sekretari i Universitetit nuk duhet të ketë të kaluar politike apo partiake, por në Statut nuk është specifikuar kufizimi i viteve, siç është përcaktuar për pozitën e Rektorit dhe anëtarëve të Këshillit Drejtues.
