Foto: KALLXO.com
Kurti takoi ambasadorët e QUINT-it, thërret konferencë për media
Kryeministri i Kosovës, Albin Kurti mëngjesin e sotëm ka zhvilluar një takim me ambasadorët e QUINT-it në Kosovë.
Pas takimit, i cili është mbajtur i mbyllur, ambasadorët e QUINT-it nuk janë deklaruar për media.
Ndërsa, kryeministri Kurti ka paralajmëruar konferencë për media sot në ora 11:00.
Kjo është konferenca e parë për media e kryeministrit Kurti pas situatës së krijuar në katër komunat në veri të vendit.
Që nga mesdita e 26 majit serbët lokalë të komunave veriore të Zubin Potokut, Zveçanit dhe Leposaviqit janë grumbulluar dhe kanë protestuar duke kundërshtuar vendosjen e katër kryetarëve të rinj në objektet komunale.
Situata e sigurisë arriti kulimin e tensionimit të hënën më 29 maj kur protestuesit u përplasen me ushtarët e misionit të NATO-s në Kosovë, KFOR. Rreth 30 paqeruajtës u lënduan, ndërsa tre u plagosën nga arma e zjarrit, konfirmoi zyra për medie e këtij misioni.
Që nga ajo kohë, reagime për gjendjen e krijuar pati nga të gjitha anët.
SHBA-të dhe BE vazhdimisht kanë kërkuar shtendosje të situatës në veri të Kosovës. Pas tensioneve në veri, SHBA ka përjashtuar ushtrinë e Kosovës nga ushtrimi Defender 23.