Kryeministri Kurti ka pritur në takim Grupin për Mbrojtjen e Liqenit të Badovcit

Kryeministri i Kosovës, Albin Kurti, të shtunën ka pritur në takim përfaqësuesit e Grupit për Mbrojtjen e Liqenit të Badovcit.

Sipas njoftimit të Zyrës së Kryeministrit, Grupi i ka prezantuar shefit të Qeverisë kërkesat në lidhje me mbrojtjen e liqeneve akumuluese gjithandej vendit, kundërshtimin e ndërtimeve afër tij dhe problemet e tjera ekologjike në përgjithësi.

Ky grup ka kërkuar takim me Kryeministrin Kurti për t’i shprehur brengat dhe kërkesat e tyre në lidhje me këto çështje.

Si kryeministër i Republikës, Albin Kurti, ka thënë që dera e tij do të jetë gjithnjë e hapur, prandaj edhe dje i dëgjoi me vëmendje e kujdes kërkesat e këtyre qytetarëve.

Gjendja me ujin e pijes nuk është e qëndrushme, prandaj edhe nevoja për liqene artificiale është e madhe. U diskutua edhe për lumenjtë, brigjet e shtretërit e të cilëve duhet të rregullohen e pastrohen, problemin me shpyllëzimin e maleve, të hidrocentraleve dhe deponive të hapura të mbeturinave, thuhet në njoftimin e Zyrës së Kryeministrit.