Komuna e Leposaviqit me nismë për trajtimin e qenve endacak

Komuna e Leposaviqit do t’i trajtojë qentë endacakë pas një Marrëveshjeje bashkëfinancimi që e ka arritur me Fondacionin zviceran StrayCoCo, që u nënshkrua më 27.03.2025.

Sipas Komunës kjo Marrëveshje në periudhë njëvjeçare përfshin kapjen e qenve nga vendi ku ata jetojnë, sterilizimin/kastrimin, vaksinimin kundër tërbimit, trajtimin kundër parazitëve dhe kthimin në vendin e tyre.

Njoftimi thotë se ky projekt synon uljen e numrit të qenve endacakë dhe ofrimin e një mjedisi të sigurt e të shëndetshëm për banorët.

“Projekti do të zbatohet nga ekipi i DVM Labinot Osmani – Klinika Veterinare Mitro Vet, partnere e Fondacionit StrayCoCo.” – thuhet në njoftimin e Komunës së Leposaviqit.

Ky projekt mbulon sterilizimin edhe të qenve me pronarë të cilët nuk mund ta përballojnë koston. Prandaj, Komuna fton të interesuarit që ta kontaktojnë këtë Klinikë në numrin +38349818202.

“Fondacioni Zvicran StrayCoco dhe Komuna e Leposaviqit mbulon edhe sterilizimin e qenve me pronarë të cilët nuk mund ta përballojnë koston.” – përfundojnë ata.

Më 12.08.2024, Komuna e Mitrovicës së Veriut ka nënshkruar të njëjtën Marrëveshje bashkëfinancimi për trajtimin e qenve endacakë.

Ndërsa, më 27.08.2024, KALLXO.com ka raportuar se aksioni për trajtimin e qenve endacakë në këtë Komunë është duke vazhduar.

Në shkurt të këtij viti, KALLXO.com ka raportuar se disa qytetarë në Mitrovicë të Veriut po pretendojnë se dikush qëllimisht po i helmon qentë endacakë.

Ata kishin dërguar në KALLXO.com fotografitë ku shihen qenë të ngordhur dhe të shtrirë në tokë.

Banori Skënder Sadiku për KALLXO.com tregonte lagjet në Mitrovicë të Veriut, ku thotë se janë hasur këto kafshë të ngordhura, teksa kërkon nga Policia edhe Komuna të ndërmarrin masa.

Qytetari tjetër Betim Osmani supozonte se çka mund t’i shtyjë qytetarët ta bëjnë këtë gjë, gjithmonë duke mos e arsyetuar veprimin e tyre.

“Ka pasë raste që i kanë sulmu qytetarët, e pastaj qytetarët i kanë helmu. Duke i dhanë çkamos, veç me i asgjësu qentë. Si nuk ka institucione që merren me çështje të sigurisë së qytetarëve, atëherë qytetarët i marrin gjërat në dorë.” – kishte thënë Osmani për KALLXO.com.

Shefi i Operativës Rajonale në Mitrovicë të Veriut, Petrit Fejza kishte thënë se hetuesit e Stacionit Policor  – Mitrovicë-Veri janë të angazhuar në hetimin e secilit rast, e po ashtu edhe në rastet me helmim të qenve.

Ndërsa, zëdhënësi i Agjencisë së Ushqimit dhe Veterinarisë (AUV) Lamir Thaçi kishte thënë se nuk është në dijeni për ndonjë rast të helmimit të qenve në këtë pjesë të vendit.