Asociacioni i Gazetarëve të Kosovës - AGK. FOTO: AGK/Facebook.
Kërcënohet përsëri me jetë gazetari Vullnet Krasniqi, reagon AGK
Asociacioni i Gazetarëve të Kosovës (AGK) ka reaguar për kërcënimet e vazhdueshme me jetë ndaj gazetarit Vullnet Krasniqi nga një qytetar nga Presheva.
Sipas AGK-së kërcënimet, qytetari R.XH., po i bënë përmes rrjetit social, Tik Tok.
“Mu’ s’mund të m’arrestoni, kurrë hiç, e 700 mijë vjet, harrojeni këtë…A Vullnet Krasniqi, ty të kam tregu se edhe sytë kam me t’i djegë cigare, mos gabo me dalë…Unë kam me ta q” f”miljen për Gold AG…Kur të më arrestoni ju Policia e Kosovës, unë ua jap dorë, ju thom hallall ju koftë…Vullnetin, kam me gjetë, mbajeni në mend çka po ju thom, 16 copa kam me ja njeh, rafall…”- ka thënë ai ndër të tjera në një nga videot e publikuara, thuhet në reagimin e AGK-së.
Asociacioni i Gazetarëve të Kosovës ka thënë se është i alarmuar me kërcënimet me jetë ndaj gazetarit, Vullnet Krasniqi.
“AGK ka kërkuar nga Policia e Kosovës që të njoftohet për veprimet që i ka ndërmarrë pas paraqitjes së rastit nga Krasniqi dhe nëse ka përparime në lokalizimin e individit që po kërcënon, nëse ai gjendet në territorin e Kosovës”
Asociacioni i Gazetarëve u ka bërë thirrje të gjithë personave publik që të mos kontribuojnë në gjuhën denigruese ndaj gazetarëve, pasi që siguria e tyre fizike vazhdon të jetë sfiduese në Kosovë.
Para disa ditëve gazetari Vullnet Krasniqi kishte raportuar në Policinë e Kosovës personin e njëjtë për kërcënim.
