KEDS licensohet profesionalisht për siguri e shëndet në punë

KEDS është licencuar për siguri dhe shëndet në punë nga Ministria e Punës dhe Mirëqenies Sociale.

Kjo licencë i mundëson kompanisë për të bërë vlerësimin e riskut dhe përpilimin e dokumentit për vlerësimin e riskut, inspektimin dhe testimin sistematik të mjeteve të punës, si dhe për përgatitjen e realizimit të programit për trajnimin e punonjësit për kryerjen e sigurt të punës.

Të gjithë punëtorët janë të pajisur me të gjitha pajisjet mbrojtëse të sigurisë dhe e kanë obligim që t’i kenë me vete vazhdimisht.

“KEDS ka investuar në certifikimin e personave si ekspertë të sigurisë dhe shëndetit në punë në vitet 2017 dhe 2019. Deri më tani janë 8 ekspert të sigurisë dhe shëndetit në punë, të shpërndarë në shtatë distriktet e Kosovës, kështu duke përmbushur me sukses obligimet ligjore. Me moton “zero aksidente në punë”, KEDS është duke punuar fuqishëm në mirëqenien e punëtorëve të vet. KEDS në vazhdën e rritjes së sigurisë në punë dhe arritjen e këtij misioni ka ndërtuar qendrën e trajnimit ngjitur me Parkun e Biznesit në Drenas. Aty vazhdimisht trajnohen punëtorët e kompanisë në një program që zgjat 4 ditë. Në fund testohen dhe secili nga ta e ka obligative t’i kalojë testet me sukses dhe të certifikohet, në të kundërtën rikthehet nga fillimi deri në certifikim”, thuhet në komunikatë.

Në komunikatën e lëshuar nga KEDS thuhet që vetëm gjatë dy viteve të fundit, nga ndërmarrja e këtyre masave për siguri e shëndet në punë kompania ka arritur t’i ulë aksidentet në punë në shkallën 40 për qind. Në bazë të kësaj ecurie parashihet që shumë shpejt ky numër të bije në zero, duke e përmbushur komplet misionin.