Ismajli viziton pikën kufitare në Muqibabë: Nuk ka asnjë rast të dyshuar me simptoma të Covid-19

Pas takimit me akterët kryesorë të menaxhimit të situates emergjente në Gjilan, nënkryetari i Komunës, Arbër Ismajli së bashku me drejtorin e Shëndetësisë, Selami Xhemaili, kanë vizituar pikën kufitare në Muqibabë, për të parë nga afër gjendjen atje.

“U njoftuam edhe nga ekipi ynë, por edhe nga policia e shtetit për gjendjen këtu. Jemi të gatshëm të ndihmojmë dhe asistojmë për çdo kërkesë që vjen nga intitucionet tona, për ta menaxhuar si është më së miri këtë situatë”, ka thënë Ismajli.

Sipas një komunikate për media, ai theksoi se gjendja është e mirë, nuk ka asnjë rast të dyshuar me simptoma të virusit nga kjo komunë dhe se nuk ka vend për panik.

“Po shpresojmë dhe besojmë që menaxhimi i situatës nga të gjithë akterët është në duar të sigurta, deri në daljen nga kjo situate emergjente”, ka deklaruar Ismajli.

Drejtori i Shëndetësisë, Selami Xhemaili, ka deklaruar se janë në baza ditore në kontakt me të gjitha institucionet relevante dhe në gatishmëri për të gjitha kërkesat eventuale nga qytetarët e Gjilanit.

Kujtojmë se deri tani në vendin tonë janë prekur nga coronavirusi 20 persona.

Qeveria e Kosovës ditë më parë ka shpallur gjendjen emergjente pas situatës me rrezikun e shpërndarjes së këtij virusi.

Qytetet si Vitia, Malisheva, Podujeva dhe Klina janë futur në karantinë pasi në këto qytete u identifikuan disa të prekur me virus.