Gjykata vendos ndaj Shaban Gogajt, i akuzuar për vrasjen e Agonis Tetajt

Shaban Gogaj është shpallur fajtor dhe është dënuar me 7 vjet e gjashtë muaj burgim për vrasje nga pakujdesia dhe armëmbajtje pa leje lidhur me vrasjen e Agonis Tetajt në kompaninë “Gogaj AG” në vitin 2018.

Sipas gjykatës, në këtë dënim do t’i llogaritet edhe qëndrimi në paraburgim nga data 23.09.2018. Masa e paraburgimit do t’i vazhdohet deri në plotfuqishmërinë e vendimit, por jo më gjatë se dënimi.

Në shpalljen e aktgjykimit, gjykata ka bërë rikualifikim e veprës penale nga vrasja e rëndë, siç e cilëson aktakuza, në vrasje nga pakujdesia.

Vendimin e datës 15.03,2024, e ka marrë trupi gjykues i udhëhequr nga Violeta Husaj-Rugova, Shaqë Curri dhe Sami Sharragjiu. Akuza e prokurorisë përfaqësohet nga prokurori nga Gjilani, Isuf Sadiku.

I akuzuari tjetër, Isuf Cacaj, është shpallur fajtor për armëmbajtje pa leje dhe është dënuar me 2 mijë euro gjobë.

Kujtojmë që Shaban Gogaj më 14.10.2022 nga Gjykata e Pejës ishte dënuar me 7 vjet e 6 muaj dënim me burgim për armëmbajtje dhe për vrasje nga pakujdesia.

Gjykata e Pejës në shpalljen e vendimit për vrasjen e Agonis Tetajt, më 14.10.2022 kishte bërë rikualifikimin e veprës penale, nga vrasje e rëndë në vrasje nga pakujdesia. Gogaj me 5 vjet burgim ishte dënuar për vrasje nga pakujdesia dhe 3 vjet burgim për armëmbajtje pa leje.

Gjykata të njëjtit i kishte shqiptuar dënim unik prej 7 vjet e gjashtë muaj burgim.

Lidhur  me këtë vendim të Themelores nuk ishin pajtuar Gjykata e Apelit duke e kthyer rastin në pikën zero.

Sipas Apelit, në masë të duhur nuk janë vlerësuar të gjitha provat për të gjetur përfundimin e rikualifikimit të veprës penale nga vrasje e rëndë në vrasje nga pakujdesia.

Në seanca e datës 12.03.2024, bashkëshortja e të ndjerit Agonis Tetaj, Albesa Cacaj u deklaura lidhur me kërkesën pasurore juridike që kishte bërë mbrojtësi i viktimave, Luan Mehmetaj në emër të saj.

Albesa Cacaj në këtë seancë tha se nuk është kërkesë e saj apo e familjarëve të Agonis Tetajt, që në emër të dëmshpërblimit të kërkohen 628 mijë euro.

“Lutem që kërkesën e parashruar nga zotëri Luan në seancën e kalume të mos merret si kërkesë e familjes së Agonisit”- kishte thënë bashkëshortja e Agonis Tetajt.

Sipas saj do të vlerësohen rrethanat dhe do të vendoset nësë rasti do të procedohet në procedurë civile për kërkim të dëmshpërblimit.

Kujtojmë se gjykimi ishte paraparë të përfundonte me seancën e datës 07.03.2024 por çështja u kthye në fazën e administrimit të provave pasi trupi gjykues revokoi pranimin e fajësisë për armëmbajtje pa leje, për të akuzuarin Isuf Cacaj.

Cacaj në seancën e 12.03.2024 dha mbrojtjen e tij lidhur me veprën penale të armëmbajtjes.

Sipas aktakuzës se Prokurorisë, në vitin 2018, në kompaninë “Gogaj AG”, Shaban Gogaj mori një telefonatë nga një person tjetër, e cila në aktakuzë është cilësuar si dëshmitare, nga e cila bisedë më pas shihet se është acaruar.

Tutje, aktakuza sqaron se Agonis Tetaj ishte larguar menjëherë në drejtim të rafteve të dyqanit përballë tij për gati 5 metra, ndërsa bashkë me të u larguan edhe dy dëshmitarët e rastit A. H. dhe F. Z.

Sipas dosjes së Prokurorisë, me të përfunduar bisedën, Shaban Gogaj, nga karriga e anës së majtë të banakut kaloi në karrigen tjetër e cila gjendej në mes të banakut dhe nga sirtari nxori revolen e tij të tipit “Beretta”, e vendosi karikatorin dhe e mori në shenjë Agonis Tetajn dhe e qëlloi me plumb në kokë, duke e vrarë.

Viktima ishte punëtor në biznesin e të akuzuarit.

Raportimet e KALLXO.com në lidhje me këtë rast i gjeni në këtë LINK