Formohet Bordi Këshillëdhënës për sektorin privat në OEK
Oda Ekonomike e Kosovës ka bërë të ditur se ka formuar Bordit Këshillëdhënës për sektorin privat.
Kryesues i Bordit do të jetë Gary Dirks, ekspert me përvojë 34 vjeçare në fushën e biznesit.
Kryetari i Odes Ekonomike të Kosovës, Berat Rukiqi, ka thënë se” “Qëllimi i krijimit të këtij Bordi është të propozojmë zgjidhje për nxitjen e investimeve dhe për të rritur eksportin e mallrave”.
Ai ka shtuar se sektori privat duhet të jetë prioritet i qeverisë së ardhshme dhe se është me rëndësi vazhdimi i reformave ekonomike që kanë ndodhur në qeveritë e kaluara, pra qeveria e ardhshme nuk duhet të ndërpres ato reforma.
Sa i përket bilancit të eksportit të mallrave, Rukiqi është shprehur se: “Edhe pse ka rritje të eksportit, rritja shumë e madhe e importit e lë nën hije rritjen e eksportit”.
Në lidhje me pengesat për eksportimin e mallrave, kryetari i Odës Ekonomike ka thënë se pengesat më të mëdha për eksportimin e mallrave në tregjet Evropiane dhe më gjerë janë mungesa e certifikimit dhe standardizimit.
Ndërsa kryetari i sapo zgjedhur i Bordit Këshillëdhënës për sektorin privat, Gary Dirks, ka thënë se në Kosovë ka parë potencial dhe dinamikë për zhvillim ekonomik dhe duke parë këtë potencial ka pranuar të jetë kryetar i Bordit.
Ai është shprehur falënderues që i është ofruar mundësia për të përkrahur zhvillimin ekonomik të Kosovës.