Dy projekte filmike nga Kosova pjesë e programit ‘First Cut+’

“The Stork” (Lejleku) nga regjisori Isa Qosja dhe “Në kërkim të Venerës” nga regjisorja Norika Sefa, janë dy projektet filmike kosovare të përzgjedhura nga programi i njohur “First Cut+”.

Qendra Kinematografike e Kosovës përmes një njoftimi ka bërë të ditur se këto dy projekte filmike kosovare do të jenë përfituese të workshopeve që ofrohen nga “First Cut+”.

“‘First Cut +’ është një program i ri i krijuar për rritjen e aftësisë konkurruese dhe tregtimit të filmave artistik që kanë marrë pjesë më parë në ‘First Cut Lab’. Programi është lansuar përmes një bashkëpunimi të ngushtë me dy platforma dinamike dhe të njohura të industrisë së filmit; ‘When East Meets West’ në Trieste dhe ‘Eastern Promises Industry Days’ të Festivalit të Filmit Karlovy Vary”, thuhet në njoftimin e QKK-së.

Sipas QKK-së, përfaqësuesit e projekteve pjesëmarrëse (duke përfshirë ato kosovare) do të kenë 3 ditë konsultime mbi promovimin, marketingun, mediat, krijimin e trailerave, lansimin në festivale, strategjinë e shitjeve nga konsulentë të ndryshëm të industrisë së filmit, të ndjekur nga një seancë Works-in-progress të hapur për vendimmarrës (si programues të festivaleve kryesore, blerës, agjentë ndërkombëtarë të shitjes, etj.).

Po sipas QKK-së, të dy filmat kosovarë të përzgjedhur nga “First Cut+”, janë të mbështetur nga Qendra Kinematografike e Kosovës dhe pritet të shfaqen së shpejti për publikun.