Drilon Hazrollaj transferohet në FC Rapid të Rumanisë

Klubi i Futbollit “Malisheva” ka njoftuar se kanë kompletuar marrëveshjen për transferimin e Drilon Hazrollajt në FC Rapid 1923 të Rumanisë.

FC Malisheva thotë se Hazrollajt do të mbetet tek ekipi i tyre deri në përfundim të sezonit, duke dhënë kontributin e tij të çmuar në skuadër, deri më 17.06.2025, kur ai do t’i bashkohet skuadrës së re në Rumani.

“Njoftojmë opinion publik se lojtari jonë më i mirë është transferuar në Rapid të Rumanisë, për një shifër rekord në futbollin e Kosovës, duke e bërë atë lojtarin më të shtrenjtë që ka kaluar ndonjëherë nga klubet kosovare!.. Kjo është një arritje jo vetëm për Drilonin, por edhe për klubin tonë, që ka besuar dhe investuar në zhvillimin e tij, e të talentëve tjerë  dhe rritjen e mundësive për të shkuar në nivele të larta” – ka thënë FC Malisheva, më 29.03.2025.

Për FC Malishevën ky transferim është një dëshmi e angazhimit të klubit për të përmbushur vizionin e tij: “të zhvillojmë lojtarët e rinj dhe të krijojmë talente që kanë synim arenen ndërkombëtare”.

Ata i kanë uruar suksese Drilonit, siç e quajnë, në kapitullin e ri.

Ne besojmë se ky është vetëm fillimi i një rrugëtimi të shkëlqyeshëm për futbollistët tanë dhe do të vazhdojmë të punojmë pa u lodhur për të krijuar mundësi për futbollistët e rinjë, të mbështesim dhe shndërrojmë ëndrrat e tyre në realitet. Ky është vetëm fillimi – së bashku do të arrijmë shumë më tepër!” – kanë theksuar nga FC Malisheva.

Në këtë klub kishin luajtur po ashtu Albion Rrahmani e Ermal Krasniqi, lojtarë të kombëtares së Kosovës dhe Florent Hasani.

Në anën tjetër, Rumania është një nga shtetet që ende nuk e ka njohur pavarësinë e Kosovës, sipas listës së njohjeve nga Ministria e Punëve të Jashtme dhe Diasporës.