Arrestimi i disa aktivistëve para ZRrE-së, deklarohet Policia e Kosovës
Policia e Kosovës ka konfirmuar se ka arrestuar 12 aktivistë të iniciativës qytetare “Asnjë cent më shumë”, të cilët sot më 02.04.2025 kanë protestuar para Zyrës së Rregullatorit të Energjisë (ZRrE), për të kundërshtuar rritjen e çmimit të energjisë elektrike në Kosovë.
Përmes një njoftimi, Policia ka thënë se protesta e aktivistëve ka qenë e paparalajmëruar dhe sipas tyre kanë shpërfillur urdhërat e zyrtarëve policorë, si dhe kanë penguar disa zyrtarë të hyjnë në zyrat e tyre.
“Duke u gjendur në rrethana të tilla, Policia ka shoqëruar në Stacionin Policor 12 prej protestuesve dhe aktualisht të njëjtit janë duke u proceduar konform autorizimeve policore në koordinim me Prokurorin e Shtetit.” – ka thënë për KALLXO.com, zëdhënësja e Policisë për rajonin e Prishtinës Flora Ahmeti.
Ndërsa iniciativa “Asnjë cent më shumë” ka thënë se në orën 08:00, kur edhe fillon orari zyrtar i punës së ZRrE-së, aktivistë të saj kanë bllokuar Zyret e ZRrE-së.
“Me zell të pakuptueshëm nga ana e pjesëtarëve të Policisë janë arrestuar dhe rrahur 12 aktivistë/e. Janë rrahur egërsisht vetëm pse po protestonin kundër rritjes edhe ashtu të rritur të çmimit të energjisë. Të rrahurit/at dhe të arrestuarit/at po mbahen në Polici. Ne kerkojmë lirimin e menjëhershëm të tyre, kurse qytetarët/et i ftojmë të na bashkohen te Zyret e ZRrE-së.” – thuhet në njoftimin e tyre.
Në pamjet e publikuara shihen aktivistë të kësaj iniciative duke u arrestuar nga Policia e Kosovës, ndërsa njëri nga aktivistët pretendon se Policia gjatë arrestimit “i ka shkelur me çizme në kokë” aktivistët.
“Asnji zyrtar i ZrRE nuk mund të punojë aty. Jo deri në një zotim, se nuk kanë për të aprovuar asnjë rritje. Deri atëherë ai nuk është vendi i tyre i punës. Deri atëherë ne jemi dhe duhet te jemi në bllokadë.” – thuhet në postimin e nismës “Asnjë cent më shumë”.
Zyra e Rregullatorit të Energjisë Elektrike (ZRrE) ka njoftuar më 14.03.2025 për propozimin e shtrenjtimit të rrymës për 15% në Kosovë, pas dorëzimit të Raporteve të Kompanive KOSTT, KEDS dhe KESCO, në lidhje me të hyrat maksimale të lejuara.
Petrit Pepaj nga Zyra e Rregullatorit të Energjisë në një deklaratë në KallxoPërnime më 14.03.2025 ka deklaruar se rritja e çmimit të rrymës nuk mund të shmanget për dy arsye.
“Rritja është e pashmangshme për shkak të kostove që kanë ndodhë. Përafërsisht 15% pritet me u rritë.” – ka deklaruar Pepaj.
“Janë dy shkaktarë kryesorë që e kanë pru këtë kosto: është mungesa e gjenerimit që ka qenë në vend; edhe në burime të ripërtëritshme që ka pasur në vend ka pasur mungesë të gjenerimit, edhe çmimet e importit – këto e kanë shkaktuar rritjen e çmimit.” – tha ai.
Rritja e çmimit të energjisë elektrike është kundërshtuar fuqishëm nga Shoqëria civile në Kosovë, si nisma “Asnjë cent më shumë”, partitë politike si LDK, AAK dhe PDK.
Po ashtu, edhe Presidenca e Kosovës më 28.03.2025 përmes një komunikate për media ka kundërshtuar propozimin për rritjen e çmimit të energjisë elektrike, nën arsyetimin se ky Propozim është në kundërshtim me Kornizën Ligjore, që e obligon Zyrën e Rregullatorit Ekonomik (ZRrE) të përkujdeset për mbrojtjen e konsumatorit dhe injoron situatën ekonomike dhe aspektin e mirëqenies në vend.
Kurse, Ministria e Ekonomisë ka propozuar që rritja e çmimit të rrymës të mos prekë amviseritë e që konsumojnë më pak se 800 kWh.
Protesta kundër ZRrE-së, ‘Asnjë cent më shumë’: U arrestuan 12 aktivistë – VIDEO
