3 të arrestuar për vjedhje në Gjykatë në Vushtrri
Policia e Kosovës ka arritur t’i kapë personat e dyshuar për vjedhjen në objektin e vjetër të Gjykatës në Vushtrri.
Lajmin për KALLXO.com e ka konfirmuar zëdhënësi i Policisë në rajonin e Mitrovicës, Avni Zahiti.
“Një rast i veprës penale ‘vjedhje’ është raportuar gjatë ditës së sotme në Stacionin Policor në Vushtrri, ku si rezultat i informacionit të pranuar dhe një reagimi të shpejtë, njësitet policore kanë arritur që në flagrancë të arrestojnë tre persona të dyshuar në kryerje të veprës penale ‘vjedhje’”, ka thënë Zahiti.
Sipas tij të dyshuarit në hapësirat e objektit të Gjykatës kanë vjedhur pjesë të ndryshme të metalit.
“Arrestimi i dy të dyshuarave është bërë mbi dyshime të arsyeshme dhe prova të siguruara se sot rreth orës 12:00, në rrugën ‘Gëzim Rama’’ në Vushtrri, tre të dyshuarit në bashkëveprim, në objektin e vjetër të gjykatës kanë kryer veprën penale ‘vjedhje’, me ç’rast nga hapësirat e objektit kanë vjedhur pjesë të ndryshme të metalit”, ka thënë tutje ai.
Zahiti ka thënë se materialet e vjedhura dhe veglat me të cilat është kryer vepra penale janë sekuestruar dhe do të procedohen në rast si prova materiale.
Ndërsa pas intervistimit, tre të dyshuarit janë liruar në procedurë të rregullt.