Kurti krahason vitin e suprimimit të suprimimit të autonomisë së Kosovës me vitin 2019

Kryetari i Lëvizjes Vetëvendosje, Albin Kurti ka shkruar për 30 vjetorin e suprimimit të autonomisë së Kosovës.

Kurti me anë të një postimi në rrjetin social “Facebook”, ka thënë se edhe pas 30 vjetëve, Serbia ende nuk e njeh shtetin e Kosovës  dhe pavarësinë e saj.

Ai ka bërë edhe disa krahasime mes viteve 1989 dhe 2019.

Më poshtë lexoni postimin e plotë të Kurtit:

1989: asgjë nuk humbet Kosova me ndryshimet kushtetuese, bile, veçse përfiton. 2019: asgjë nuk humbet Kosova me korrigjimin e kufijve, madje, vetëm përfiton.

Sot janë mbushur tri dekada nga suprimimi i autonomisë së Kosovës. 23 marsi 1989 ishte shtetrrethim: gjendje e jashtëzakonshme, orë policore, mbi njëqind tankse e 15 mijë forca të armatosura jugosllave. Për pasojë, në pranverën e atij viti, dhjetëra shqiptarë u vranë në demonstrata e qindra të tjerë u arrestuan. Që nga ajo kohë edhe medie ndërkombëtare filluan ta konsiderojnë Kosovën të pushtuar e të okupuar.

30 vjet më vonë, Serbia nuk na e njeh pavarësinë. Sepse, presidenti atje është nga po ajo rrymë politike serbe së cilës edhe autonomia për Kosovën i dukej e tepërt. Dhe, sepse presidenti këtu te ne është nga ajo rrymë politike shqiptare që jep territor shteti për pushtet për veti.

E, kur pushteti dhe qeveria janë më të rëndësishme se territori dhe shtetësia, atëherë edhe partia bëhet më e rëndësishme se popullsia. 1989: punësimi, me librezë partie. 2019: punësimi, me librezë partie dhe afri farefisnie.