Punonjësit e Prokurorisë së Prishtinës dolën në protestë për shkak të mungesës së ajrit në objekt, në Pallatin e Drejtësisë, Foto: KALLXO.com
Rrena për të arrestuarin e katërt në rastin e Liridona Murselit
Deklarata
Arrestohet i dyshuari i katërt në rastin e vrasjes së Liridona Murselit
Vlerësimi
Rrenë
Publikimi me përmbajtje se është arrestuar i dyshuari i katërt në rastin e vrasjes së Liridona Murselit është i rremë. Krypometër ka verifikuar me burime zyrtare se në këtë rast deri me datë 04/12/2023 në orën 19:00 janë arrestuar vetëm 3 persona në lidhje me këtë rast.
Artikulli
Faqet në Facebook Gazeta Era dhe Portali Lajme Shqip kanë publikuar një artikull në të cilin thuhet se janë arrestuar katër persona për vrasjen e Liridona Murselit.
“I arrestuari i katërt për vrasjen e Liridona Murselit pjesëtar i FSK: Reagojnë Ministria e Mbrojtjes”- thuhet në titullin e këtij artikulli.
Në këtë artikull pretendohet se Policia deri me datë 2 dhjetor 2023 ka arrestuar katër persona për vrasjen e Liridona Murselit.
Krypometër ka kontrolluar artikullin dhe në brendësinë e tij përmenden vetëm tre persona. Aty tregohet se si në orët e mbrëmjes janë arrestuar dy të dyshuarit e parë, Naim Murseli dhe Granit Plava.
Më pas në artikull shpjegohet se Kushtrim Kokalla, që është pjesëtar i Forcës së Sigurisë së Kosovës është i arrestuari i tretë në këtë rast dhe jo i katërti si thuhet në titullin e lajmit.
Lajmi më pas shpjegon reagimin e Ministrisë së Mbrojtjes për këtë rast dhe përfshirjen e pjesëtarit të FSK-së në ngjarje.
Për të verifikuar se në këtë rast janë arrestuar vetëm tre persona, Krypometri ka kontaktuar me prokuroren Besa Limani e cila ka konfirmuar se janë tre persona të arrestuar në këtë rast, e jo katër. “Janë vetëm tre presona të arrestuar”- ka thënë prokurorja Limani.
Krypometër ka kontaktuar edhe me zëdhënësen e Prokurorisë Themelore në Prishtinë, Laureta Ulaj e cila po ashtu ka konfirmuar se në këtë rast janë vetëm tre të arrestuar.
“Mund të konfirmojmë se është arrestuar personi i tretë i dyshuar për përfshirje në këtë rast”- ka thënë Ulaj për Krypometër.
Krypometër ka arritur të sigurojë edhe vendimin e gjykatës i cili mbanë numër të protokollit PPRKR.nr.309/23. Në të thuhet se në rastin në fjalë janë arrestuar vetëm tre persona.
Më 29/11/2023 Liridona Murseli, mbeti e vrarë në Prishtinë. Fillimisht ngjarja filloi të trajtohej si “Grabitje me pasoja të vrasjes”.
Dy ditë më vonë, më 01/12/2023 në pranga të PK-së ranë tre të dyshuar, në mesin e tyre edhe bashkëshorti i viktimës, Naim Murseli.
