Shtime
Fatimja, gruaja e kryetarit aktual të Shtimes, Naim Ismajlit thotë se do të donte të martohej edhe një herë me burrin e saj në kohën e sotme, pasi dasmat i duken më të mira sot.
Debatet zgjedhore të emisionit Jeta në Komunë, sivjet i portretizojnë kandidatët për kryetarë komunash me fjalët e partnerëve jetësorë, ose anëtarëve të familjes së tyre.
Gratë e gjashtë kandidatëve për kryetar të Shtimes zbuluan edhe gjëra tjera të panjohura për bashkëshortët e tyre.
Hanife Ademi dhe Florie Rashiti, gratë e kandidatëve të VV-së dhe AAK-së, Enver Ademit e Xhemshir Rashitit thanë se burrat e tyre dinë të përgatisin makarona dhe gjëra të lehta ushqimore.
Burrat e tyre i lavdëruan të gjitha gratë dhe kërkuan që ata të votohen nga qytetarët për arsyen se janë shumë të mirë.
Fatime Ismajli tha se burri i saj Naimi, i pari i Shtimes, ka pasur para luftës kalë, e më pas traktor. Bukurie Musliu, gruaja e kandidatit të pavarur Isufit tregoi se burri i saj pëlqen shikimin e meçeve të boksit, ndërsa Hanife Ademi, gruaja e kandidatit të VV-së, tha se burri i saj shikon filma aksion.
Nga debati i së hënës mbrëma doli se Naim Ismajli kur ka kohë luan futboll, por marrja me sport nuk i ka ndihmuar ta shpëtojë klubin më të njohur shtimjan nga shuarja.
Klubi i hendbollit të femrave “Vjosa” ka ndërprerë aktivitetin për mungesë mjetesh e kushtesh, në kohën kur komuna ka mbështetur klubin shtimjan të volejbollit të meshkujve që nuk njihet për rezultate.
Ismajli në debat tha se klubet janë ndihmuar barabarësisht, por atyre u mungon salla e sporteve.
Ai premtoi palestër sportive për Shtimen gjatë këtij viti.
Kryetari aktual i Shtimes më pas u lavdërua se infrastruktura rrugore e Shtimes është kryer në 90 për qind të territorit, ndërsa shtoi se qytetarët do të kërkojnë të vazhdohet me rezultate.
Kandidati i LDK-së: Komuna po shtron “asfalloç”
Asfaltin e shtruar në komunën e Shtimes, Fatmir Zymberi, kandidati për kryetar të komunës nga LDK-ja e quajti “asfalloç”, duke u ankuar për kualitetin e dobët të tij.
Debati u nxeh kur u fol për gjashtë gurthyesit e Shtimes. Pesë kandidatët e subjekteve politike thanë se do t’i zhvendosin gurthyesit në vende të përshtatshme, pa ndërprerë punën e tyre, duke mos saktësuar cilat janë ato vende.
Kandidati i pavarur Isuf Musliu tha se shtimjanëve u duhet ngopja me bukë, pas së cilës do të mendojë për ndotjen e ajrit dhe ambientit. Ai nuk tregoi si do ta sigurojë bukën e përditshme për bashkëqytetarët e tij.
Për gurthyesit në debat u pranua se po thërrmojnë pjesën më të bukur të komunës, në të cilën mund të zhvillohet turizmi malor.
Kandidati i PDK-së Ismajli tha se njërin nga gurthyesit e drejtojnë simpatizantë të LDK-së. Kandidati i partisë më të madhe opozitare nuk e mohoi këtë.
