Foto: Urim Krasniqi/KALLXO.com

Shpëtim Thaçi thotë se trajtimi më i mirë i COVID-19 është vaksinimi

Pulmologu në Qendrën Klinike Universitare të Kosovës, Shpëtim Thaçi, sonte në #KALLXOPernime ka folur për trajtimin e coronavirusit.

Sipas tij, vaksinimi është e vetmja mënyrë për parandalim dhe largim të infeksionit në botë.

“Trajtimi më i mirë i COVID-it është vaksinimi. Ajo që e parandalon këtë infeksion është vaksinimi”, tha ai.

Në anën tjetër pulmologut i duket e panevojshme shkuarja e pacientëve për trajtim të COVID-19  në shtete tjera, pasi që ai thotë se të gjithë qytetarët pa përjashtim i kanë marrë të gjithë shërbimet e duhura në institucionet shëndetësore gjatë kësaj periudhe të pandemisë.

“Ka mjekë të jashtëzakonshëm duhet vetëm t’ i jepet mundësia t’i krijohen kushte dhe të kenë hapësir për të punuar”, thotë tutje Thaçi.

Kujtojmë se shteti i Kosovës nuk e ka blerë asnjë dozë vaksine kundër COVID-19 edhe pse janë ndarë 40 milionë euro për blerje të vaksinës.

Mirëpo, institucionet shëndetësore në vend janë furnizuar me vaksina nga donacionet e dhuruara nga shtetet partnere, më 28.03.2021 arriti kontingjenti i parë me 24 mijë vaksina “AstraZeneca”, kundër coronavirusit, donacion nga UNICEF i programit COVAX nga Organizata Botërore e Shëndetësisë, si dhe më 05.05.2021 Bashkimi Evropian i dhuroi Kosovës 4,680 doza të vaksinës “Pfizer/ BioNtech”. Poashtu pritet që rreth 100 mijë vaksina të vijnë në Kosovë këtë e ka bërë të ditur Komisioneri për Zgjerim dhe Fqinjësi i Bashkimit Evropian Oliver Varhelyi ditë më parë.