Kthehet Barrikada Mbi Lumin Ibër
16:17
Kryetari i komunës veriore të Mitrovicës Goran Rakiq u është drejtuar gazetarëve të mbledhur te Ura e Ibrit, duke thënë se pas konsultimeve të vazhdueshme me Qeverinë e Serbisë ka marrë vendimin për ndërtimin e „Parkut të Paqës“ mbi urën e Ibrit.
„Ky është mesazh për të gjithë botën se serbët e kësaj pjese refuzojnë të jetojnë në frikë dhe nuk ia kanë frikën askujt. Ne ua zgjasim dorën fqinjëve tanë shqiptarë, me shpresën se ky gjest i yni nuk do të shihet si dobësi e jona“, tha Rakiq.
14:14
Ka filluar rivendosja e barrikadës mbi lumin Ibër.
Sipas informacioneve nga vendi i ngjarjes disa banorë të veriut kanë vendosur disa saksi betoni dhe përmes një ekskavatori janë duke derdhur rërë për të bllokuar rrugën mbi urë.
Sipas gazetarëve në vendin e ngjarjes janë Marko Gjuriq, drejtor i të ashtuquajturës Zyrës për Kosovë dhe Metohi dhe Goran Rakiq kryetar i Mitrovicës së Veriut, bashkë me rreth 50 persona tjerë.
Deri më tash kjo ka ndodhur në qetësi, megjithë praninë e policisë dhe karabinierëve të cilët nuk kanë ndërmarrë gjë në ndalimin e këtyre veprimeve.
Barrikada është duke u vendosur në të njëjtin vend ku ka qenë barrikada që është hequr mbrëmë pas mesnatës.