Të pagjeturit, 22 silueta për 22 vite pritje 

Para Qeverisë së Kosovës sot kanë zënë vend 22 silueta të njerëzve që nuk janë, e duhet të ishin në mesin tonë, të pagjeturit e luftës së fundit në Kosovë.

Këtë instalacion e kanë bërë aktivistët e organizatës ‘Youth Initiative for Human Rights – Kosovo (YIHR) si kërkesë për zbardhjen e fatit të të pagjeturve të luftës në Kosovë.

Përmes këtyre 22 siluetave është tentuar të përçohen 22 vite pritje për zbardhjen e fatit të 1630 persona të pagjetur gjatë luftës së fundit.

Foto: Urim Krasniqi/KALLXO.comAktivistja, Bjeshka Guri nga YIHR, tha për KALLXO.com se këtë instalacion e kanë bërë në kuadër të 30 gushtit, Ditës Ndërkombëtare të Viktimave të Zhdukjeve të Dhunshme.

“Sivjet si shumë vite të tjera që i shënojmë kemi vendos t’i vendosim 22 silueta që mungojnë për me sjellë në fokus 22 vite të kaluara prej zhdukjeve të dhunshme si akt simbolik me bashkëndje me familjet e personave të pagjetur dhe si thirrje ndaj Qeverisë që ta shtojnë përkushtimin për zbardhjen e fatit të personave të pagjetur” tha Guri.

Kryeministri Albin Kurti para disa ditësh kishte thënë për KALLXO.com që problemi më i madh që po e ngadalëson zbardhjen e një mijë e 632 të pagjeturve në Kosovë, është mungesa e qasjes në arkiva të Serbisë.

“E vërteta gjendet në arkivat e shtetit serb të cilët ata nuk po i hapin, mirëpo me bashkësinë ndërkombëtare në njërën anë, por edhe me një bashkëpunim institucional të vendit tonë në anën tjetër, besoj që do të mund të bëjmë më shumë në mënyrë që ata të cilët ende nuk janë kthyer të kthehen. E di që kjo është një plagë që koha nuk e mbyll, mirëpo nuk është bërë edhe gjithçka që është e mundur në këtë aspekt, meqenëse në njërën anë kemi humbur kohë pa angazhim të mirëfilltë dhe në anën tjetër kemi përballë një shtet që vazhdon ta konsideroj popullin tonë dhe republikën tonë dhe shtetin tonë në mënyrë armiqësore”, kishte thënë ai.

Që nga paslufta, në Kosovë dhe Serbi janë kryer zhvarrime në varreza masive dhe deri me tani janë gjetur rreth 70 për qind e të zhdukurve.

Më 5 maj, në Kizhevak të Rashkës në Serbi, kishin rifilluar gërmimet për mbetjet mortore të viktimave të luftës së viteve 1998-99 në Kosovë. Gërmimet e para në varrezën masive të Kizhevakut, janë bërë në fund të vitit të kaluar.

Atje janë gjetur mbetjet mortore të 4-5 personave.