SHBA: Serbia ende nuk ka mbajtur përgjegjës ata që u përfshinë në sulmin në Banjskë

Ambasadorja amerikane në OKB, Linda Thomas-Greenfield, ka ripërsëritur qëndrimin e SHBA-së për dënimin e sulmit terrorist të paramilitarëve serbë në Banjskë më 24 shtator 2023.

“Sa jemi këtu, duhet ta vendosim vëmendjen e Këshillit ndaj kërcënimeve akute të sigurisë dhe stabilitetit që vijnë nga jashtë Kosovës. Shtetet e Bashkuara përsërisin dënimin tonë për sulmet e bashkërenduara të dhunshme paraushtarake serbe ndaj Policisë së Kosovës pranë Banjskës në shtator, të cilat rezultuan me vdekjen tragjike të një rreshteri të Policisë së Kosovës”- deklaroi ajo.

Linda Thomas-Greenfield tha se Serbia ende nuk ka mbajtur përgjegjës ata që janë përfshirë në planifikimin dhe zbatimin [e sulmit], duke shtuar se, lideri i vetëshpallur i sulmit është ende i lirë në Serbi.

“Kanë kaluar katër muaj që nga ky sulm dhe Serbia ende nuk ka mbajtur përgjegjës ata që janë përfshirë në planifikimin dhe zbatimin [e sulmit]. Lideri i vetëshpallur i sulmit ende është i lirë në Serbi. I bëjmë thirrje Serbisë që të ndjekë përgjegjësinë e plotë për autorët e sulmit të 24 shtatorit. Serbia duhet të punojë me KFOR-in që një sulm i tillë të mos ndodhë më”- tha ajo.