SHBA-ja ua bllokon kanadezëve qasjen në Bibliotekën ndërkufitare

Një qytezë e Kebekut ka njoftuar për atë që e ka quajtur vendim të njëanshëm të autoriteteve të Shteteve të Bashkuara të Amerikës, për të mbyllur qasjen kanadaze në një Bibliotekë që ndodhet mu në vijën kufitare ndërmjet Kanadasë dhe Shteteve të Bashkuara – raporton Reuters.

Shtëpia e Operës dhe Biblioteka e Haskellit të Lirë ndodhet mu në kufirin SHBA-Kanada ndërmjet qytezave Standstead në Kebek dhe Derby Line në Vermont. Është kthyer në simbol të unitetit dhe bashkëpunimit ndërkufitar, si dhe si një mundësi për familjet e ndara që të bashkohen.

Hyrja është në anën e Vermontit. Më parë, vizitorët kanadezë mund të hynin duke përdorur shtegun anësor dhe hyrjen nëpërmjet anës amerikane, por janë “inkurajuar” sipas faqes së Bibliotekës, që me vete të kenë edhe dokumentet.

“Kjo mbyllje jo vetëm që përbën komprometim për qasjen e vizitorëve kanadezë në një simbol historik të bashkëpunimit dhe harmonisë ndërmjet dy vendeve, por edhe dobëson frymën e bashkëpunimit kufitar që shquan këtë lokacion ikonik.” – ka bërë të ditur qyteza e Stansteadit të enjten, sipas kohës lokale amerikane.

Doganat dhe Mbrojtja Kufitare e Shteteve të Bashkuara nuk i është përgjigjur menjëherë kërkesës së Reutersit për koment.

Raportet ndërmjet Shteteve të Bashkuara dhe Kanadasë, aleate të kahershme, janë acaruar në nivelet më ulëta në histori prej ardhjes së Donald Trumpit në Shtëpinë e Bardhë dhe pas kërcënimit të tij për ta aneksuar Kanadanë dhe për ta kthyer në shtetin 51-të amerikane. Trumpi i ka vënë Kanadasë edhe tarifa tregtare.

Senatori amerikan, Peter Welch, demokrat nga Vermonti, i ka quajtur shqetësuese raportet për mbylljen e hyrjes.

“Vermonti e do Kanadanë. Ky institucion i përbashkët kulturor feston një partneritet ndërmjet dy kombeve tona.” – ka shkruar Welch në X.

Përgatiti: Rexhep Maloku – Kallxo.com